Shillong, Naitung 05: U nongialam ka liang pyrshah u Dr Donkupar Roy, u ba la long teng ruh kum u myntri rangbah ka jylla, haba ia dei bad ka lynti rel, u la ong ba dang don kam ban ia mir jingmut ha kaba ia dei bad kane ka kam ban ia peit ia kaei kaba bha bad ia kaei kaba sniew.
Lada shem ba ki don shibun ki jingbha ruh un sa ia shim ia ka rai bad lada don bun jingsniew kiba lah ban mih na ka lynti rel ruh kin hap ia shim ia ka rai kumno ban pynduna ia ki, ia kane ka bynta dei ban dang hap ban iathir ia tai na baroh ki liang ha ki rynsan bapher bapher.
Haba ia dei bad ka jingong ba kan don ka jingwan rung jong ki briew kiba na sha bar, u Dr Donkupar u la ong “ haba u briew u mih na ka jong ka jaka jong u un leit sha ka jaka ba u sngewthuh ba don ka jingim lada u sngewthuh ba kam don jingim un nym leit dalei lei ruh em”.
Haba ia dei bad ka jingiakynad hapdeng ka sorkar bad ki seng bhalang halor ka lynti rel, na ka liang jong u Dr Donkupar u la ong ba ka jingiapyneh kam bha, ka sorkar ka dei ban wad ki lad ki lynti ban pynbeit ia kane ka kam, ka dei ban don la lynti ban ia pynbeit. Haba ki paidbah ki pyrshah kaei ka jingdon kam ban leh kyrkieh.
Ha ka synshar paidbah ka jingialeh markylliang kan nym iarap, kan wanrah ia ka jingsniew, hynrei ha ka synshar paidbah haba ka don kano kano ka jingeh dei ban don ka jingiamir jingut bad ia ka jingiaphylliew jingmut na ia shai ha baroh ki liang.
