Shillong, Nailar 24: U myntri khynnah jong ka sorkar pdeng u D. V. Sadananda Gowda, u ba dei peit ia ka tnad Statistics bad Programme Implementation, u la ong ba ka lynti rel na Assam sha Shillong la niew ia ka kum ka ‘national project’ bad shisien ba la buh ia ka ha katei ka kyrdan ka pisa kam don jingeh.
U Myntri khynnah jong ka sorkar pdeng u la ong ba ka sorkar pdeng ka tip ia ka jingpyrshah jong ka seng samla pule ban shna ia ka lynti rel sha kane ka jylla Meghalaya wat la u myntri rangbah ka jylla u da kwah eh ba kane ka jingtrei ia kane ka lynti rel kan iaid sha khmat ha kane ka jylla.
Ban ia pynbeit ia kane ka jingeh, lada ka sorkar jylla ka don kam ia ka jingtuklar lem jong ka sorkar pdeng na ka liang jong ka sorkar pdeng ka long kaba la kloi ban leh ia kata. U la iathuh ba ha kane ka jingialang kaba la long mynta ka sngi u la ioh ia ka jingpynshai halor kane ka lynti rel.
Ha ka juh ka por u ne u myntri khynnah jong ka sorkar pdeng u la ong, haba wan rah ia kino kino ki kam pynroi ha ka jylla dei ban don ka jingiamur jingmut lang bad ki briew. U la ong ba ia kaei kaba u la ioh jingtip mynta ka sngi ha kane ka jingialang un sa ai jingtip sha u myntri kabinet ba dei peit ia ka lynti rel bad ia ki kam shna surok jong ka sorkar pdeng.
Haba ia dei bad ka lynti rel, la ong ba ia ka lynti rel kaba ia dei hapoh ka jylla Assam 21.5 km la dep ban shna, katba ha poh ka jylla Meghalaya la shna tang 2.2 km ha Byrnihat, kane la lynti rel hapoh ka jylla Meghalaya ka jingjrong jong ka ka long 108 km.
Ka sorkar pdeng kala buh ka pisa T.6000 klur na ka bynta kane ka kam, la pynlut tang T.240 klur ha u snm 2015-2016 bad 2016-2017 la pynlut tang T.200 klur. Ka sorkar pdeng kala dep buh ia ka pisa bad ka sorkar jylla na ka bynta ban shim jaka bad kata ka long T.250 klur.
Ha ka juh ka por la ong ba ka sorkar pdeng ka kloi ban ai jingiarap ia sorkar jylla ban pynkhlain ia ka statistic department jong ka sorkar Meghalaya, ka sorkar pdeng kala kloi ban ia pisa T.10.9 klur ban leh ia kane bad na ka bynta ban shna ia ka DPR ka sorkar pdeng kala dep ai 10 lak tyngka.
