Shillong, Naiwieng 13: U Bah Mandal Summer u Ba la ujor da ka PIL hapoh ka iing bishar jong ka Meghalaya High Court ha kaba ia dei bad ka jingthung ka sorkar ia ki 17 ngut ki parliamentary Secretary, halor ka rai jong ka iing bishar kaba la pynmih ha ka 09.11.2017 mynta ka sngi u la leit ban ia kynduh ia u Lat jong ka jylla u Ganga Prasad ban dawa na u ba dei ban pynduh noh ia ka jinglong MLA jong ki 17 ngut ki parliamentary Secretary.
Ha ka jingthoh kaba u la ai mynta ka sngi sha u Lat jong ka jylla u Bah Sumer u la ong ba katkum ka rai jong ka iing bishar ba don burom ha ka 09.11.2017 ha kaba ia dei bad ka PIL No.5 jong u snem 2016 na ka liang jong ka iing bishar kala buh ia ka rai ba ka shnong ha ka kti jong u Lat ka jylla ban shim ia ka rai kane ka long katkum ka rai jong ka Division bench jong ka Meghalaya High Court.
Na ka liang jong ka iing bishar ba don burom kala pynduh ia ka ain jong ka sorkar jylla ia kaba la tip kum ka Meghalaya Parliamentary Secretaries (Appointment, salaries, allowances and miscellaneous Provision)Act 2005 ba kane ka ain ka long beain. Haba ia dei bad ka jingdawa ban pynduh ia ka jinglong dkhot ia ki 17 ngut ki MLA ka shong ha ka rai jong u Lat lada don kiba ujor katkum ki kyndon jong ka ain.
Katkum katei ka rai jong ka iing bishar ba don burom kumba la ai la kdew ruh ia ka mutkotduma kaba la long ha pdeng ka u Bimolangshu Roy bad ka sorkar Assam ha ka mukotduma (Civil) No.169 jong ka snem 2006, na ka bynta ban pynduh ia ka jinglong dkhot jong ki MLA ha ka jylla katkum ka jingpynbna No.CA.09/2013/4 kaba la mih ha ka 14.03.2003 ka kyrteng jong ki MLA ba bat ia ka kam parliamentary Secretary.
Ka kyrteng jong ki, ki long u Bah Coming One Ymbon, u Samuel M Sangma, u Limison D Sangma, u Winnerson D Sangma, u Bah Kennedy Cornelius Khyriem, u Cherak W Momin, u Brigady Marak, u Sengman Marak, u Rophul S Marak, u Bah Robinus Syngkon, u Micheal T Sangma, u Bah Justine Dkhar, u Ashahel D Shira, u Bah Stephanson Mukhin, u Bah Celestine Lyngdoh, u Noverfield R Marak bad u Marthon Sangma.
Ia kitei baroh 17 ngut ki parliamentary Secretary la thung katkum ka Meghalaya Parliamentary Secretaries (Appointment, salaries, allowances and miscellaneous Provision)Act 2005 ia kaba la pynduh da ka iing bishar ka MHC. Ha kane ka jingthoh kaba la ai mynta ka sngi sha u Lat ka jylla na ka liang jong u Bah Sumer u la kyntu ia u Lat jong ka jylla ba ud ei ban pynduh noh ia ka jinglong MLA jong ki 17 ngut ki parliamentary Secretary jong ka jylla Meghalaya.
