Shillong, Naiwieng 19: Ka AJYWO Central Body kaba dei kawei na ki seng synrop ha ka kynhun jong ki 13 Seng kiba ba la dawa ban teh-lakam ia ka rung ka mih bad ka shong ka sah beaiñ jong ki mynder ha ka jylla Meghalaya, lyngba u kyrwoh ba la pyllait da u Bah M H Dkhar, President jong ka seng.
Kane ka la ong ba kum shi bynta ban buddien halor ka jingpynieng ia ki khyrdop bad ka jingpyntrei kami ia ka District Task Force Committee ha ka ban talasi bad teh-lakam ia ka rung ka mih bad ka shong ka sah beaiñ jong ki nongwei ha ka jylla, ka la ong ba shen kan sa ia kynduh ia ki Deputy Commissioner jong ka West bad East Jaintia Hills District.
“Dang shen ha ka jingiakynduh jong ngi ki 13 seng ia u Chief Minister, Conrad K Sangma ka jylla ban ia kren halor ka jingpyntrei kam jong ka sorkar ia Meghalaya Residents Safety and Security Act-2016 bad ruh halor ka jingpynieng ia ki Entry bad Exit Points bad ka jingpyntrei kam ia ki District Task Force Committee ha ka ban talasi bad teh-lakam ia ka rung ka mih bad ka shong ka sah beaiñ jong ki nongwei hapoh u pud u sam jong ka jylla, kam shym la pynhun satia ia ngi namar ka jingsuki palat ka jingtreikam jong ka sorkar jylla ha ka jingiadei bad kane”, ong u Bah M H Dkhar.
Katkum ka kyrwoh na ka AJYWO u la ong ba ka long kaei kaei kaba pyndiaw ia kikum ki 13 seng namar mynta lah saw snem ki la iaid lynti ban dawa na ka sorkar jylla ban tehlakam ia ka rung ka mih bad ka shong ka sah beaiñ jong ki nongwei ha ka jylla hynrei haduh mynta ruh ka sorkar kam pat shym pa lah ban pynieng kawei ruh na kita ki 41 tylli ki Entry/Exit Point ha ka jylla lane pyntrei kam pura ia ki District Force Committee”.
U Bah M H Dkhar u la ong biang, “Wat ia ka District Task Force Committee kaba dei ban talasi bad peit ngor khnang ban tehlakam ia ka rung ka mih bad ka shong ka sah beaiñ jong kiba nabar hapoh u pud u sam jong ka jylla ym pat shym la pyntrei kam pura mynta. Ka shu kut imat tang ha kaba thaw ia ka District Task Force Committee khlem trei kam ei ei ruh em.”
“Ka jinglongshngaiñ jong ka jaidbynriew jong ngi ha la ka jong ka ri ka long kaba donkam eh ha khmat ban ia kiwei kiwei baroh. Kumta ngin ym shong kli kti ha ka jingiadei bad kane ka ishu ka ba dei na ka bynta ka iap ka im jong ka jaidbynriew rit pait jong ngi. Ngi dawa na ka sorkar ba ka dei ban pynsted la ka kam.
Shen kin sa leit buddien man ka por ia kane ka kam hapoh Jaintia Hills da kaba ia kynduh ia ki ar Deputy Commissioner jong ka thaiñ ban wad jingtip na ki ha ka jingiadei bad ki Entry/Exit Points bad ruh ka District Task Force Committee” ban ruh ban dawa na ki ba ki dei ban pynsted ban pyntrei ia ka jingpynieng ia ki tei ki khyrdop bad ruh ban pyntrei kam noh wut ia ka District Task Force Committee hapoh jong ka thaiñ” kren pynkut u Bah Dkhar.
