Shillong, Nailar 9: Mynta ka sngi la tep Don burom ia u bah HS Shylla u riew rangbah uba ka jaitbynriew kala duh. Ha kane ka sngi wat hapdeng ka jingwit na kane ka COVId-19 hynrei ki riew paw khmat na kylleng ka Ri khasi kila poi ban burom khatduh ia une u rangbah ha kane ka sngi tep.
Ha jingialang pyndon burom khatduh ia u ne u rangbah la pynlong ha iing jong u ha Lumkhriem haba ki riew rangbah kila kren bad pynsngew ia ka jinglong ba phylla jong u bah HS Shylla ha jingshakri jong u ha ki kam paidbah kiba na ka bynta ka jaidbynriew.
Ha ka jingkren u bah Bindo M Lanong na ka liang jong ka KHADC u wei ki riew sain pyrthei u la pynkynmaw ia jingiatyngkhuh ha kaba ba ia dei bad ka Clan Bill ka ba la wanrah da u bah HS Shylla hapoh iing dorbar ha KHADC.
Haba iadei bad kane ka Clan Bill u bah Bindo ula pynkynmaw ba u la tar ia kane ka bill hapoh iing dorbar bad mynta kane ka bill ka ba u bah Shylla u la wahrah kan sa urlong noh shen.
Kiwei kiba la kren ha kane ka sngi u bah Adelbert Nongrum MLA, na ka Synjuk Rangbah Kur la kren da u bahut Aristotle L Mawphlang, na ki sengbha lang u bah Roykupar Synrem, na Ka Sur u Paidbah la kren da u bah Egenstar Kurkalang, na ka liang ka kur Syiemiong la kren da u Bah Edmund Syiemiong bad na ka kur Shylla la kren da u bah Pyrkhat Shylla.
Ki nongkren baroh kila pynpaw ia ka jinglong ba kyrpang u bah HS Shylla naduh ba wan lambi ia ka sorkar lai lama u kum u riew paidbah, kum u MLA u la leh bun ki kam bad kum u CEM ula wanrah ia ka Clan Bill ban tehsong ia ka jaidbynriew bad bun kiwei kiwei ki kam ba u la leh ban im ka kyrteng sahi ka nam.
Ia ka jingialang shuwa ban pyndep ia ka niam ka rukom la pyniaid da u bah Jacob Shylla, baroh ki khubor sngewlem kiba la phah na kylleng ka Ri Khasi kila poi haduh palat ia ka sawphew tylli. Ia ka jinglehniam la pyndep da u pastor Ebling Majaw na ka balang Umlyngka.
Ia ka jingialang la sdang ha ka por 1.00 baje noh phai sngi bad la pyndep naduh ka jingialang haduh ka jinglehniam ha iing haduh ka por 4.25 baje noh phai sngi. Ki riew rangbah kina la ia poi ki long na baroh ki sengsain pyrthei, ki seng bhalang ban pyndon burom katduh ia une u riew rangbah.
Ia u bah Hispreachring Son Shylla la kha ha ka 7th Kylalyngkot 1954 bad u la khlad ha ka 7th Nailar 2020, u la iehnoh sha di en ia ka kurim kong Susana Syiemiong lai ngut ki khun kynthei bad ki ksiew. Latep don burom ha u lum jingtep ka Balang ha Shillong ha Wahkdait Laitkor.
