Shillong, Jymmang 21: U Myntri rangbah ka jylla u Conrad K Sangma haba jubab ia ka jingiakren halor ka mang tyngka na ka bynta u snem 2020-2021, u la iathuh hapoh ka iing dorbar ba ka sorkar kala kyntiew ia ka MLA skhim na ka T.2 klur sha ka T.2.5 klur tyngka ha ka shisnem.
U myntri rangbah u la ong ba kane ka mang tyngka kaba la wanrah ka long ka plan na ka bynta ki shiphew snem kiba dang wan, kane ka long kum ka jingsdang ha kaba ka sorkar kala dep ban mang lypa ia kino ki jaka kiba hap ban shim khia ban kyntiew ia ka jylla.
U Myntri rangbah u la ong ba kane ka sorkar kala shim ba ka tnad pule puthi ka dei kawei na ki tnad sorkar ka ban kyntiew ia ka jylla bad hapoh jong kane ka kyntup lang ia ka tnad rep bad kum juh ia ka koit ka khiah kine ki long kum ki mawkhrung ban kyntiew ia ka ioh ka kot ka jylla.
Haba ia dei bad ka jingioh ka jylla u Myntri Rangbah u la iathuh hapoh ka iing dorbar ba kala don ka jingduna ha ka jingioh na ka sorkar pdeng da 20% haduh 25% bad ha kine ki ar bnai ka jylla ha ka jaka ba kan ioh T.428 klur kaba dei ka bhah jong ka jylla Meghalaya kala ioh sa tang T.352 klur tyngka.
Ha ka juh ka por la iathuh hapoh ka iing dorbar ba ka sorkar pdeng kala shah ia ki sorkar jylla ba ki lah ban shim ram na ki iew ki hat ban pyndap ia katei kaba duna da ka pynkiew na ka 3% kaba la buh bhah baroh shi katta ka sha ka 5% bad kane kan iarap ia ka jylla ban pynioh pisa kan nym duna ia ka T.600 haduh T.700. klur.
U Myntri Rangbah u la ong ba ki nongrep ki dei ka pdeng jong ka jingtrei kam jong ka sorkar bad khamtam lei mynta u snem mynta u snem u ba dei u snem jong ki nongrep ha kane ka jylla Meghalaya. La ong ba kan long ka jingmyntoi kaba khraw na ka jingpynbna jong ka sorkar pdeng ia ka T.20 lak klur bad T.1 lak klur la mang kyrpang ia ki nongrep.
Haba ia dei bad ki kam pynroi sha ki nongkyndong u myntri rangbah u la ong ba jylla Meghalaya kala pyndon kam bha ia ka skhim MGNREGA bad ka jylla Meghalaya mynta u snem kan ioh kumba T.1800 klur ha kaba pyntrei ia kane ka skhim bad ka sorkar kan pynkhlain shuh shuh ia ki kynhun ia treilang ha ki nongkyndong kumba ka long mynta kila don haduh 22000 tylli ha ka jylla.
U Myntri rangbah u la iathuh ruh ba kala don ka jingkylla ha ki katto kane ki bynta ban pynsted ha kaba pyntrei kam ia ki skhim, la iathuh ba la sdang na ka CMRDS ha kaba ka jingai ia ka sangtion ka lontg beit na ka ophis jong u Chief Minister sha ki DC dei na kane ka daw ba ha kine ki ar snem la lah ban sangtion haduh 170 tylli ki skhim ban ia nujor bad ki san snem kiba la leit ha kaba la lah ban sangtion tang 210 tylli ki skhim.
Ka sorkar kala shim ia ka rai ruh ba lada kano kano ka skhim kala lah ban pyndep ia ki jingdon kam baroh wat lada kam ioh sangtion ha ka 31st u Lber jong ka snem mang tyngka ia kum kita ki skhim ym pyniaid beit khlem da don kam shuh ban leh kumha ki por ba la dep ba ki skhim ki hap ban iaid biang na sdang.
Ka sorkar ka dang ia leh mynta kumno ban pynbeit ia ka jingsiew ia ka bai bam ki tynmen Old Age Pension ba ki dei ban ioh noh ia ka bai bam jong ki man u bnai, kane ka long ia ki Muster Roll bad ia ki ASHA ruh kum juh ba ki dei ban ioh noh ia ka bai nongjong ki man la u bnai.
Haba ai dei bad ka tnad pule ka ong ba ka sorkar kala mang T.40 klur ban pynbha ia ki iing skul, T.10 klur na ka bynta ki smar Class ha ki 110 tylli ki iing skul. Haba ia dei bad ka jingthmu ban pynbun shuh shuh ia ki smart Class ka sorkar kala pan lyngba ka NEC sa T.12 Klur tyngka.
La iathuh ba ki 25 tylli ki block kin sa ioh ia ka ki EMRS skul, ha kaba ia dei bad ka tnad ka koit ka khiah la mang T.50 klur, ha ka juh ka por ka sorkar ka dang wad ki lad kumno ban pynlait ia ki doktor ha kaba pynkhreh ia ki skhim namar kane kala buh ia ki ha ka jingeh ha kaba 50% na ka por kila bun kam ha kaba pynkhreh ia ki skhim kim ioh shuh ia ka por ban sumar ia ki nongpang.
Haba phai sha ki surok, u myntri rangbah u la ong ba ka sorkar kala mang pisa 590 klur, ym tang kata kan don noh ka plane ka ban leit ban wan na Delhi sha Shillong bad ia ka Baljek Airport ruh kane ka sorkar kala shim khia ban ioh ba ka dei ban trei kam noh kaba sah mytna ka long tang ban pynheh ia ka jaka mareh ka plane.
U myntri rangbah u la iathuh ruh hapoh jong ka iing dorbar ba ka sorkar kala shim ia ki lat ki lynti kumno ban pynbha shuh shuh ia ka jinglum khajna kum na ki marpoh khydnew bad kum juh na ka kyiad bad kiwei kiwei ki lad kiba ka jylla ka lah ban ioh.
Haba ia dei bad ka jingkren jong kidkhot jong ka iing dorbar ha kaba ia dei bad ka jingbat ia ka tulop jong ki nongtrei sorkar, u myntri rangbah u la ong ba ia kane kaba ka sorkar ka bat mynta ym sa siew biang sha ki nongtrei sorkar baroh ha ka por ka biang.
