Shillong, Nailur 29: U myntri khynnah ka sorkar pdeng u ba dei peit ia ki kam jngohkai pyrthei u K J Alphons u la ong ba “hapoh ka sorkar BJP kam shym don kawei ruh ka iing mane ba shah thang, baroh kiba mih ha ki social media dei ki kam thok kam shukor shuda ban pynbud nam ia ka BJP”.
Haba kren ha ki nongthoh khubor mynta ka sngi ha Shillong, u ne u myntri ka sorkar pdeng u la ong ba ka jingjia kaba dang shen ha Utter Pradesh, kam dei ba shah beh ne shah pynjop, hynrei ka dei ka jingjia kaba ka jaka ka dei ka jaka sorkar ia kaba ki ia pynbeit, hynrei la kynnoh ba shah leh bein ki khristan.
Ha u snem 2013 kala don ka jingkynnoh ba lada ka sorkar BJP ka wan ha ka por hane ki Khristan, ki Muslin bad kiwei kiwei ki rit paid kin shah leh bein, kane ka dei ka jingialam bakla jong ki liang pyrshah tang ban pynthame ia ki paidbah.
Kane ka sorkar kaba la ialam da u myntri rangbah duh u Narendra Modi, ka kren shai ba ki paidbah nongshong shnong jong ka Ri India ki lah ban bud ia kano kano ka niam kano kano ka jingngeit, ka sorkar kan ai ka jingiada ia ki baroh namar ka Ri India ka dei ka Ri lait luid. Ki jingkynnoh baroh ka dei tang ki kam thok kam shukor bad lada don kiba leh ruh ka sorkar kan pynshitom.
Haba ia dei bad ka jingong ba khang bam doh masi, kane ka dei ka jingpynsngewthuh bakla ia ki briew da ki katto katne kiba pyrshah ia ka BJP, “ Yn nym don ba lah ban khang ia ka bam ka dih jong u ne ka briew ka sorkar kan nym khang”
