Shillong, Naitung 27: U Conrad K Sangma mynta ka sngi u la leit rah da ka Zero Hours hapoh ka iing dorbar bah jong ka Ri India ban ia kren halor ka jingshlei Um ha kane ka dong shatei lam mih ngi jong ka Ri India bad khamtam eh ia ka jingshlei um ha Garo Hills.
Ha ka jingkren jong u hapoh Lok Sabha mynta ka sngi u la dawa na ka sorkar pdeng ba ka dei ban phah noh mar dor ia ki jingiarap na ka bynta ki paidbah katei ka thain ri lum Garo kiba don mynta ha pdeng ka jingeh kaba khraw.
U la ong ba ka sorkar pdeng ryngkat bad ka sorkar jylla ka dei ban leh ei ei noh kloi halor kane ka jingshah lynshop ha ka mariang ha Ri Lum Garo. Hapoh iing dorbar u Conrad u la ong ba kiba la shah ktah eh ha kane ka jingshlei um kum ka, Tikrikilla, Chibinang, Phulbari, Rajabala bad kiwei ki jaka ruh kumjuh.
Nalor kane na ka liang jong u MP na Tura u la leit ruh ban ai da ka jingthoh sha u myntri ba dei peit ia ka dong shatei lam mih ngi jong ka Ri India u , Dr Jitender Singh ban kyntu ia u ba u dei phahkloi ia ki lad jingiarap.
