Shillong, Naitung 08: Da ka jignpyntrei kam ia ka rukom lum khajna kaba thymmai ia kaba la tip kum ka Goods and Services Tax (GST), ki nongleit iew ban siew ban tda ha iing ha sem kila sdang ban ia kren ba kala don ka jingduna ki mar ki matta ha iew ha hat ha kine ki sngi kiba juh pyndon kam paidbah bad ka jingkiew dor kynsan ki thiar kum u khaw, sabon, shini bad kiwei kiwei.
Na ka liang jong ka Meghalaya Chamber of Commerce (MCC) kaba die peit iaka khaii pateng ha kaba ia dei bad ki marbam mardih ki tiar ba pyndon kam ha ki iing ki sem, u RL Sethia u wei na ki dkhot jong kane ka MCC, haba kren ha u SP News Agency, u la iathuh ba ka don ka jingshisha ba ki don ki tiar kiba la duna ha iew ha hat mynta, ka daw ka long ba lai sngi shuwa ba kan sdang trei kam ka GST, ki company kim pynlait shuh ia ka mar ka jong ki na ki karkhana, ha ka juh ka rukom na ka liang jong ki nongkhaii ruh ki khlem thied mar ha dien ba la pyntrei kam ia ka GST namar baki hap ban simjingkhein shuwa ia kiba la dep ban thied shuwa ba kan trei kam ka GST namar ba ki hap ban peit ia ki mar kiba dang sah.
Kane ka jingwanrah ia kane ka rukom lum khajana kaba thymmai kala wanrah ia kane ka jingduna jong ki mar ki matta ha iew ha hat, hynrei kane ka long tang khyndait sngi, mynta ki kali kit mar kila don ha lynti hynrei ban poi sha Shillong ka shim por la kumno kumno shiphew sngi, la ong ba shen kane ka jingduna jong ki mar ki mata kan sah jahnoh ha kine ki khyndiat sngi, kane ka jingduna jong ki mar kam shym la jia tang ha kane ka jylla hynrei ha baroh ki bynta jong ka Ri India.
U Sethia, u la ong ba kane ka jingeh kan don hynrei kane ka jingeh kan sa jah ha dien ba ki kali kit mar kila poi namar ban poi ka kali kit mar na ki karkhana ka shim por la kumno kumno hapdeng phra bad shiphew sngi, u la kren skhem ba shuwa ban kut une u bnai ka iew ka hat kan sa iaid beit kum ba juh long, la ong ruh ba da kane ka jingpyntrei kam ia ka GST ka jingmyntoi kan long ia ki paidbah namar bun ki tiar ki tar kin sa hiar dor. Ka don ka jingeh haba bujlir ia ka rukom trei kam na kaba rim sha kaba thymmai.
Hynrei kaba ki nongkhaii mynta ki dang sah ha ka umdun ka long, ia u khaw, Atta, Moida bad Suji namar haduh mynta kam pat don ka jingbatai kaba shai kdar u ei uta u khaw branded bad u bym dei branded, kumjuh ia u Atta, Suji namar bun kine ki wan na sha bar ka jylla Meghalaya, haba ia dei bad u shini mynshuwa kam don khajana hynrei mynta la don khajana. Na ka liang jong ki nongkhaii marbam mardih ki dang ap ban ioh ia ka dor jong ki khajana ha kaba ia dei bad ki tiar ki tar ynda kila ioh ia kane ka iew kala iaid beit kum bajuh long.
