Shillong, Iaiong 25: Ka jingkylli kaba ki paidbah ki kylli hato ka jylla Meghalaya kan ioh ban pynlong ia ka National Games ha u snem 2022 ka ban long ruh ka jingrakhe ia ka jingdap jong ka jylla 50 snem.
Ka por ban poi sha katei ka jingpdiang ia ka National Games da ka jylla Meghalaya ka sah sa tang lai snem mynta, hynrei haduh mynta kam pat don ka dak ka shim ba ka sorkar kan sdang noh ia ki jingtrei khamtam ia ka stadium ha Mawdiangdiang ia kaba la bei pisa da ka sorkar pdeng T.350 klur tyngka.
Ka jingtei ia ka “Games Village” ruh haduh mynta kam pat don dak ba kan don ka jingsdang ia ka na ka bynta ban pynsah ia ki nongiashim bynta ki ban wan ia shim bynta ha katei ka National Games. Bun na ki paidbah ki buh ka jingkylli hato ka jylla Meghalaya kan ioh ban pdiang ia ka National Games ha kane ka jylla ha u snem 2022.
Na ka liang jong ka sorkar kala thaw ia ki komitti bapher bapher ban peit ia kane ka kam bad kala thung ruh ia ki kynhun bapher bapher ban peit ia kane ka kam, hynrei haduh mnynta ym pat iohi ia ka dak ka shin ban sdang ia ki jaka ialehkai ha ki bynta bapher bapher.
