Shillong, Naitung 06: Ban ia shai ha pdeng kane ka sorkar Meghalaya Democratic Alliance (MDA) kaba la ialam da ka seng National People’s Party (NPP) ha kaba ka seng People Democratic Front (PDF) ka dei kawei na ki seng kiba ia don lang ha kane ka sorkar, ka Parliamentary Party jong ka seng kala ia shong mynta ka miet ban ia kren ha ka jingiadei hapdeng ka sorkar bad ka PDF.
Ka jingmih khubor ha kine ki sngi, ha kaba u Chairman jong ka PDF u Bah PN Syiem u la kren ha kilad pathai khubor ba lada ka NPP ka weng ia ka jingkyrshan ia ka EC kaba la ialam da ka PDF ha KHADC , ka PDF kan weng ia ka jingkyrshan na ka sorkar MDA kaba don saw ngut ki MLA ha kaba ar ngut ki dei ki myntri kabinet.
Halor katei ka jingkren jong u Chairman ka PDF, u symbut Myntri rangbah ka jylla u nongialam jong ka NPP u Bah Prestone Lyngdoh u la ong ba lada ka PDF ka weng noh ia ka jingkyrshan ruh kam pat don jingma ia ka sorkar MDA kaba la ialam da ka NPP.
Haba u SP News Agency u la ioh ban ia kren bad u bah Banteidor Lyngdoh MLA jong ka PDF u ba dei u nongialam hapoh jong ka Parliamentary Party jong ka PDF, u la iathuh ba ka jingialang jong ka Parliamentary Party jong ka PDF kala ia shong ha ka meit sngi palei bad mynta ka miet ruh kin dang ia kynduh biang ban ia kren halor ki khubor kiba la mih ha kine ki sngi.
