Shillong, Jymmang 24: U myntri rangba
h ka jylla u Conrad K Sangma mynta ka sngi u la pynkut ia ka jingialap elekshon ka jong u ha kane ka elekshon shiteng samoi ha Ampati Konstitwensi na ka bynta u kyrtong ka seng u Clement G Momin da kaba ai jingkren ia ki nongtrei ka party ha iing jong u kyrtong ha Latri, ha ka jingiadon lang u Bah AL Hek na ka BJP bad u Bah Samlin Malngniang naka HSPDP.
Haba kren ha ki nongtrei jong ka party u national president jong ka seng NPP u la ong “ husiar bad long kiba ia tylli phi kiba dei ki nongthep but namar ki liang pyrshah ki ngeit ba kin pynbeij ia ki paidbah nongthep but da ka bor jong ka tyngka”. U la kyntu ia ki nongtrei party ba ki dei ban pynshngiang ia ki para nongtrei party, dei ban pynsngewthuh ia ki paidbah ha man ki polling station ban nym ngop ha kane ka jingleh kaba sniew.
U myntri rangbah u la ai mynsiem ia ki nongtrei jong ka party ha kaba u la ong ba ka party NPP kala dang kiew hapoh jong ka Ampati Konstitwensi bad u la kyntu ia ki nongtrei ka party ba kin dang iai trei shitom ha kine ki khyndait sngi ban wanrah ia ka jingiatylli ban kyntu ia ki paidbah ban but ia ka NPP.
Ha kane ka jingialang bad ki nongtrei party ha Latri, u Conrad u la kynnoh ba ka seng Congress ka ngeit ba ki lah ban pynkylla tang hapoh ka shimiet, kum ki nongtrei ka party leit sha oaidbah ban ong ba kane ka election ba kin but ia u briew u ban don ha ka liang synshar ba ba kin shim khia ia kane ka elekshon namar kin but na ka bynta ka jingkylla, la ai mynsiem u Conrad ia ki nongtrei party.
Ha ka jingkren jong u Bah AL Hek myntri ka koit ka khiah na ka seng BJP u la ong ba kum ki nongialam jong ka BJP kila leit sha kylleng ki bynta jong ka Ampati Konstitwensi ban pan ia ka jingkyrshan jong ki paidbah ba kin pynjop ia u kyrtong ka NPP u ban don lang ha ha ka sorkar Meghalaya Democratic Alliance (MDA). U la kyntu ia ki nongtrei party ba kin pynsngewthuh ia ki paidbah ban jied ia u kyrtong ka NPP na ka bynta ban wanrah ka jingkylla ha ka roi ka par ban leh ia kane don kam u nongmih khmat ban don ha ka liang synshar.
Ha ka jingkren jong u Bah Samlin Malngniang myntri ba dei peit ia ka tnad sam umbam umdih u la ong ba ka party ka ai jingkyrshan ia u Clement G Momin kyrtong ka NPP bad ki paidbah ki dei ban pynjop ia u kyrtong ka NPP u Clement G Momin bad ka long kaba kongsan ha kane ka election ba wat tang shi but ruh kan wanrah ia ka jingkylla kaba khraw, u la kyntu ia ki nongtrei party baroh ba kin trei shitom ha kine ki sngi kiba dang sah ban ioh ia ka jingjop jong ka party NPP bad kan long ka burom ban pynrem ia ka kyrtong jong ka seng Congress.
