Shillong, Kyllalyngkot 28: Haka 28tarik Kyllalyngkot 2023 naka liang jong u Lambokstarwell Marngar President KSU Sengkmie Uba la long kum u Kongsan ula ïoh ban pynhap pyrda noh ïaka Maitshaphrang Inter dong Football knockout Tournament ba lai sngi bala pynïaid da ka KSU Mawlai Mawroh Unit.
Ha kane ka sngi la don lang u Samla Biangbor L.Paliar President ka KSU Mawlai Circle bad ha kumjuh ka por Uba dei u Vice – President KSU Sengkmie kum u Symbud Kongsan.
Ha katei ka sngi pynhap pyrda kala don ka jing ïalang ba lyngkot bala pynïaid da u Samla Gary Mawlieh Organising KSU Mawlai Mawroh Unit, la ïoh ïaka jingkren maitphang na U Samla Eddie Malngiang President KSU Mawlai Mawroh Unit.
Haba ai jingkren ha katei ka sngi naka liang jong u Symbud Kongsan u la ai ïaka jing ïaroh ïa katei ka shnat treikam kaba la shimkhia ban pynlong ïa kaba kum kane ka Tournament kaba lah ban wanrah ïaka jing ïajan ïaki Khun Samla jong kane ka Shnong, ula ong ba kum ka Seng ka ju pynshlur ïa baroh ki shnat treikam kiba don ha kylleng jong ka Bri U Hynñiewtrep ba kin ai rynsan ïaki Khun Samla khnang ba kin lait naki jingmlien kiba sniew kiba la kharoi stet ha kine ki sngi.
Ha ka jingkren u President ka seng kum u kongsan u la ban jur ba ki Samla ki donkam ïa kiba kum kine ki jingïalehkai kilan met namar haba ki khun Samla ki shait ki khlaiñ ki lah ban ïakhun ïa kino kino ki bor ba thmu ban wan thombor ïaka Jaidbynriew.
U la ban ruh ba U I kumba ha kine ki sngi ki don ki bor kiba nabar kiba thmu ban pyntroiñ ïaka Jaidbynriew jong ngi da kaba wanrah ïa kiei kiei kiba sniew ha kane ka Ri baieid jong ngi khnang ba ki Samla kin ngam ha kitei ki jing sngewbha ki ban long pat jingshah hiar thma ba jar jar ïaka Jaidbynriew.
Kumta u la kyntu ïaki Khun Samla ba kin kiar ïa kitei ki jingmlien kiba sniew bad ki bym tei ïaka imlang ka sahlang bad kin mih shakmat ban shakri ïaka Ri bad ka Jaidbynriew ha ki bynta bapher bapher kaba ki don.
Ka jingïalehkai phainal ha katei ka sngi ka long hapdeng Pingwait pyrshah ïaka Umsohkhlur ha kaba ka Umsohkhlur kala ïoh ïaka nam lahduh bad kala ïoh da ka Trophy bad Lai tylli u syiar katba ka Pingwait kala ïoh da ka Trophy bad Ar tylli u syiar.
Kala don ruh ka jingsam ïaki khusnam shimet ha kaba u rang ap kol batbit la ïoh da u Badonkupar Kharsohnoh naka kynhun Pingwait, ïaka nam u nongthep kol ba bun laïoh da u Neville Majaw naka Umsohkhlur bad kum u rang ïalehkai ba tbit la ïoh da Kolestarwell Lyngdoh naka Umsohkhlur bad ïaka Discipline Team laïoh da ka Mawlyndop.
