Shillong, Rymphang 17: U shongknor jong ka Meghalaya Energy Electrical Corporation Ltd bad dei u nongpyniaid ba ha khliehduh jong kane ka kompeni sam bor ding ka jylla u Arunkumar Kembhavi u la ong ba mynta kim shah shuh ban siew ia ka bai light shiteng shiliang.
Haba kren ha u SP News Agency, u CMD jong ka MeECL u Kembhavi u la ong ba kito kiba pynsah bai light ki hap ban siew shisien siew, mynta ym shah shuh ban siew shiteng shiliang, lada kim siew un ot ia ka light , la ki dei ki ophis sorkar ne jong ki riew shimet.
Haba ia dei bad ka jingailad ia kiba pynsah bai light ba kin siew shisien siew ba kin ioh ia ka map ia ka bai siew slem ka MeECL kam shym pynjlan shuh kala kut ha ka 31st Kyllalyngkot 2021, ia kito kiba la ioh ia ka jingmynjur la shah pat ba kin siew pyndep shuwa ka 31st Lber 2021.
Na ka liang jong ka MeECL kala iaid mynta sha khmat ban ot ia ka light ia ki ophisar sorkar, la kid ei jong ka state lane jong ki ophis jong ka sorkar pdeng lada ki pynsah ia ka bai light bad kane kan long ruh kum juh ia ki ka iing jong ki riew shimet.
Ka MeECL kam ban se ban shim ia kane ka sien jam namar ba ka jingsah bai light sha ki tnad sorkar ka long la jan baroh bad kane ka jingbym siew kala buh ia ka MeECL ha ka jingeh ban siew pat sha ki kompnei ba ai light.
Kumba ka long mynta ka jylla Meghalaya ka don kam light kumba 350 MW, katba ka jingpynmih na ka jylla ka long kumba 250 MW antad ia kaba duna la hap ban thied da ki kompeni jong ka sorkar pdeng ia kaba ka MeECL ka hap ban siew thikna lem kumta kan shah ot kumba la jia ha kine ki sngi.
