Shillong, April 14: Ia ka Bethany Hospital Shillong la khang bad baroh ki nongtrei kiba don hapoh ka hospital ki hap ban “quarantine” hapoh jong ka hospital. Ka sorkar kala dep ioh kyrteng ia baroh kito ki riew shimet kiba la leit sha katei ka jaka sumar bad kiwei ruh la bun bala ioh jingkhein. La ong u Myntri Rangbah ka jylla u Conrad K Sangma.
Mynta ka sngi u myntri rangbah u la khot ia ka jingialang jong ka kabinet bad ha kane ka jingialang kaba mynta ka sngi la shim ia ka rai ba baroh kito ki rai kiba la shim ha ka jingialang mynin ka sngi la pynduh noh bad kin nym trei kam shuh.
Ka kabinet la shim ia ka rai ban pyntrei kam biang ia ka rukom leh kaba mynshuwa haduh ba kin da raid a kumwei pat, la khang ban ia leit ia wan na kawei ka District sha kawei pat. Haba ia dei bad ka jingpynpoi ia ki marbam ka sorkar kan sa pyntip paidbah
Haba ia dei bad u ba pang COVID-19, u myntri rangbah u la iathuh ba u wei na kiba ha iing jong u ba pang la wan na kawei na ki ri kiba shah ktah ha u Corona Virus, wat la ym lah ban pynshisha pura namar ba ka sorkar ka dang phah tohkit halor kane.
La iathuh ba u ne ba pang mynta haba la wan phai sha Shillong u la pyntip sha ka sorkar bad u la register hapoh jong ka 108 bad u la leh ruh ia self quarantine bad une u briew u khlem pyni ia ka dak ka shim ba don jingpang, ki briew jong ka tnad ka koit ka khiah ki leit ban ia kynduh hynrei ym shym pyni ban don ka dak ka shim ba don jingshitom ha u.
Na ka liang jong u myntri rangbah u la kyntu ia ki paidbah ban nym kyntoh ei ei ia u ba shitom kum juh ia ka iing ka sem namar kane ka jingpang ka lah ban ktah iano iano ruh khlem da niew iano iano, la u dei na kano kano ka jaka, ka dei ka por ba kum ki nongshong shnong ban pyni ia ka jingkit khlieh ha kum kane ka por ban ia leh pyrshah ia kane ka jingpang, la ong u myntri rangbah.
U Myntri rangbah ka jylla u pan ia ka jingkyrshan na ki paidbah ha kum kane ka por ba ka jylla ka ia kynduh ia ka jingeh, u khot u wer ban ia tylli lang kawei ban ia treilang bad ka sorkar da kaba bud ryntih ia baroh ki jingbthah kiba la ai na ka sorkar na ka por sha ka por.
Ka don ka jingsngew ha ki briew ba kane ka jingpang ka lah ban saphriang tang na kaba shu peit, hynrei kum ki paidbah dei ban tip ia ka jingshisha ba lada pyniajngai, la da leh khuid ban ong ba ioh ia kane ka jingpang kan duna, la kyntu ruh ia ki lad pathai khubor ban nym pynsyier haba thoh ia ki khubor.
U Myntri rangbah u kyntu ia ki paidbah ban nym syier sha ba palat, hynrei sumar pat ia lade, da kaba leh kumta yn lah ban iada ia lade, u myntri rangbah u pynshai ruh ba kam dei nar ia ioh ia kane ka jingpang hap ban buh hapoh Ventilator ban iada ka jingim.
U Myntri rangbah ka jylla u la shim ruh ia ka jingkhein na kiwei ki ri ba 85% kane ka jignpang kam da ktah haduh katta katta, don bun bah ki briew kiba don ia kane ka jingpang kim tip namar kam don dak namar hapdeng 14 haduh 21 sngi ki briew ki jem hi. Namar bun ki don ia ka jyrhoh, baiong khlieh, kthamet bad kane ka lah ban long haduh 28 sngi bad ha dien kata ki jem hi.
Ia mynta la shim nuksa ban test haduh 91 ban phah test ha dien ba don u wei u nongpang bad ia ka result jong kine ki test jong ki dang ap. Halor ka jingiap jong u wei u briew ba kynthih na jrong ka Hospital kam don jingiadei ei ei ruh em bad kane ka COVID-19, kane ka jingleh ka dei ba u shim hi noh ia la ka jong ka jingim.
