Shillong, Nailar 30: Da ka ba shimkhia khnang ban kyntiew ia ka jingnang jingstad jong ki samla hapoh ka thain, Ka K.S.U South West Khasi Hills District Unit, kan pynlong ia ka Maitshaphrang Academic Award jong une u snem 2016; na ka bynta ki samla khasi ki ba wan sha khmat ha ki eksamin jong ki.
Da kaba ngeit skhem ba ki samla ki long ka lawei baphyrnai jong ka jaitbynriew bad ka jingnang jingstad kum ka atiar ban kynjoh sha ka. Dei lyngba ka jingroi ha ka jingnang jingstad ba ngin sa lah ban kyntiew ia la ka ri bad jaitbynriew. Kumta Ka seng ka pynshlur bad ai mynsiem ruh ia ki ba dang don hapdeng ki jingpule jong ki bad ka kyntu ba kin trei shitom khnang ban ioh kheit ia u soh ka jingjop.
Kane ka jingpynkup burom ia ka ban pynlong ha u naiwieng ka long na ka bynta kiba ioh merit list ha ka SSLC bad HSSLC, ki gold medallist ha ka bachelor’s degree, master’s degree bad kiwei kiwei de ki eksamin jong une u snem 2016 bad kiba long ruh ha kajuh ka por ki nongshongshnong jong ka Mawkyrwat, Ranikor bad Mawsynram C&RD Block, kiba hap hapoh ka jylli treikam jong ka seng.
Kumta la kyrpad ia ki samla ki ba bit ban ioh pdiang ia kane ka award ban sngewbha ban pynpoi ia ki Mark sheet bad residential certificate sha kawei na kine ki ophis treikam jong ka seng, kata ha Mawkyrwat, Pongkung bad Jaiaw, hashuwa ka 31 tarik risaw 2016.