Shillong, Kyllalyngkot 18: Ka jylla Meghalaya kan sa rakhe ia ka “ Meghalaya Day 47” ha ka 21 tarik mynta u bnai ha Soso Tham Auditorium Shillong, ha kaba u myntri rangbah ka jylla u Conrad K Sangma yn long u kongsan bad u myntri ka tnad pynneh riti dustur u Bah AL Hek un ia don lang.
Ha kane ka sngi rakhe ia ka jingdap 47 snem jong ka jylla ia ka jingioh jylla ba pura, la shah ia ki paidbah ba kin rung sha Ward’s Lake bad Lady Hydari Park khlem da don kam siew, kan ruh ka jingiakop pyni syntiew ha State Central Library bad ha Polo kan don ka jingialehkai kynjatboll ha pdeng ka kynhun jong u myntri rangbah bad ki ophisar.
Naduh ka 22 haduh ka 25 tarik kin don bun ki jingialehkai bad ki jingiakop ia kiba yn sa pynlong ha ki bynta bapher bapher bad ia ki nongjop yn sam ia ki khusnam ha ka 26 tarik mynta u bnai ha ka sngi rakhe ia ka Republic Day ha madan polo.
