Shillong, Naiwieng 30: U Bah Wanphrang K Diengdoh u ba la wad bniah halor u Motphran u ba don mynta ha jan Iewduh u la pynnih ia ka phlim kaba la ai kyrteng “Because We Did Not Choose” ia kaba yn sa pyni paidbah khlem da don kam bai tiket ha Khasi National Dorbar Hall ha Mawkhar ha ka 8 tarik u Nohprah 2017 ha ka por 5.00 baje jan miet.
Haba kren ha ki nongthoh mynta ka sngi ha Shillong Press Club, u bah Diengdoh u la ong ba ha kane ka jingwad bniah la lap ba ha u snem 1916-1917 kumba 56 ngut ki Khasi bad ki Pnar kila leit sha Ri France ban leit bylla ki kuli na ka bynta ki shipai jong ka Ri Bilat bad ha dien 20 snem ki sa wan phai.
U la ong ba ha kane ka jingwad bniah ka jong u la lap ia ki jingtep jong kine ki nongbylla na Khasi bad Garo kiba don ha Ri France bad na ki jingthoh kiba don ha Ri Bilat, kane ka jingleit ka dei kaba heh tam na kane ka dong shatei lam mih ngi jong ka Ri India. La ong ba ki phareng kila ialam 50000 ngut ki briew kyntup lang ia ka Assam ha katei ka por, na West Bengal bad Bihar.
Ha kane ka jingialam ia ki khasi sha katei ka kam bylla kit kuli, ka dei ka jingiatreilang jong ka Balang Wales Presbyterian ha kaba ia rai kila shim ha ka jingialang ha Mawphlang kaba la long ar sngi lynter 2 haduh 4 tarik jong u bnai Lber 1917, hapoh ka jingialam jong u Rev Shai Nabuh Manner bad u Rev DS Devies. Ia phadar jong ka Salvatorain jong ka Balang Kotholik la beh namar la suba ba kid ei ki nongsyntiat namar ki dei na ka Ri Gernamy.
U Bah Diengdoh u la ong ba ha kane ka Jylla Meghalaya mynta ki don lai tylli ki Mot kiba la tei nam ha ka kyrteng jong kine ki nongbylla, u wei ha Iew Musiang ha Jowai, u wei ha Tura bad u wei ha Motphran bad ha kine ki mat jong kine ki mot la thoh ia ka kyrteng jong ki briew kiba la khlad noh ha ka tham bah ba nyngkong ia kaba la tip kum ka WW-I.
Haba ia dei bad kane ka kam, u Bah Diengdoh mynta u la pynlong ia ka jingsoi kyrteng bad ia kane ka jingsoi kyrteng yn phah sha u myntri rangbah ka jylla u Dr Mukul Sangma ban pynrung ia kane ka Parom sha ki kot pule namar kane ka dei ka jingjia kaba khraw na ka bynta ki briew jong kane ka jylla. Katba ia ki nongbylla ki kuli na Garo Hills la ialam da ka Garo Hills American Baptist.
