Shillong, Risaw 10: U bah Kenny Lyngdoh uba la pynmih ia ka phlim kaba la ai kyrteng “Gang of North East” ha ka ktien hindi ula ong ba mynta ia kane ka phlim la pynkylla sha ka ktien khasi ha kaba un sa pyni paidbah ha Biju Cinema Hall ha ka 13 tarik haduh ka 19 tarik mynta u bnai.
Ia kane ka phlim kaba la pynkylla sha ka ktien khasi la pyllait paidbah mynta ka sngi ha shillong press club da u bah Benjamin war. Haba batai halor kane ka phlim la ong ba la pynwan dur halor ka jinglong jingman ki samla kane ka juk mynta kiba la ngop ha ki jingdih drugs ba kumno kane ka jingdih drugs ka ktah ia ka imlang sahlang, ka iing ka sem bad khamtam eh ia u ne ka kiba ngop ha kane ka jingdih.
Ia kane ka phlim ha ka ktien hindi la dep ban pyllait paidbah ha sor Guwahati bad shen un sa pyni ruh ha kiwei kiwei ki bynta ka dong shatei lam mihngi jong ka Ri India. Ki tyngshop ki puron ha kane ka phlim kiba bun ki dei na kane ka jylla Meghalaya, Assam bad Nagaland.
La ong ba ka jinglut ha kaba pynmih ia kane ka phlim ka la kot sha ka T.50 lakh. Ka jingmih kumba ka long haduh mynta ka dang long dang kumba 70% ei ei. U bah Lyngdoh u ong ba u don ka jingkyrmen ba lehse kin sa lah ban pynmih ia kaei kaba la lut ha kane ka phlim. Ha kane ka sngi la don lang ruh ki nong ia shim bynta ha kaba pyllait paidbah ha ka ktien khasi ia katei ka phlim.
