Shillong, Nohprah 19: U Myntri rangbah jong ka jylla u Conrad K Sangma haba jubab ia ki jingiakren hapoh ka iing dorbar halor ka rai ban pyntrei kam ia ka inner Line Permit, Bengal Eastern Frontier Rehulation 1873 ha ka jylla u la ong hap ban ioh ia ka jingsoi jong u president ban pynmih ha ka jingpynbna ba la pynrung ia ka jylla Meghalaya, ym don kam ban leit sha ka iing dorbar jong ka Parliament.
Haba pynshai halor ka jingong ba balei ka sorkar kan pyrshah ia ka CAB 2019, kaba mynta kala kylla CAA, 2019, u myntri rangbah u la ong ba mynshuwa ka jylla Meghalaya ka ngat ha ka CAB, ka sorkar kala pyrshah ia kane bad kam shym la long ain ha katei ka por.
Hynrei mynta ka CAB 2019, kala kylla long ka CAA 2019, Ha kane ka kynti kaba mynta ka jylla Meghalaya ka long ba 97% ka CAA ha kane ka jylla kam nym trei kam, hynrei ka sorkar ka kwah ban ka 3% ruh ruh dei ban pynlait ia ka jylla Meghalaya na ka CAA. Ka sorkar ka kwah ban lait 100% na ka CAA 2019.
Halor ka jingkyntoh ia ka MP na Tura ba ka kyrshan ia ka CAB, 2019, u myntri rangbah u la ong ba kito kiba kren kim shym la sngap ia ka jingkren jong ka MP ia kaei kaba ka kren hapoh ka iing dorbar, kala dawa ba ia ka CAB dei ban pynlait ha baroh kawei ka jylla Meghalaya, kum juh ia ka North East baroh kwei kane ka jingdawa jong ka MP.
Ka sorkar mynta ka dang pynleit jingmut kumno ban ioh ia ka ILP ha kane ka jylla Meghalaya ban iada ia ki briew jong ka jylla dei na kane ka daw ba mynta ka sngi la wanrah ia ka mat ban ia kren halor ka ILP don kam ban ia kren ia kane ka phang.
Ka sorkar ka pyrshah ia ka CAA dei na kane ka daw ba ka sorkar jylla ka kwah ba ka 3% kaba ngat ha ka CAA, 2019 ruh dei ban pynlait na kane ka jylla Meghalaya, ka jingiakren ka dang iaid bad u myntri rangbah duh jong ka Ri India bad kum juh bad u myntri kam poh iing ka Ri India ban pynlait ia ka jylla Meghalaya 100% na ka CAA,2019.
U Myntri rangbah u la ong ba ha ka jingshisha ia kane ka rai ban pyntrei kam ia ka ILP ha kane ka jylla la dei ban shim naduh mynshuwa, na ka liang jong u myntri rangbah u la kyntu ia ka iing dorbar ban pdiang ia kane ka rai jong ka sorkar kaba dei ka jingdawa jong ki paidbah
