Shillong, Naitung 27: U myntri khynnah ka sorkar pdeng u Dr. Sanjeev Kumar Baliyan mynta ka sngi ha ka jingiakynduh bad ki nongri jingri kane ka jylla ha ophis jong ka tnad ri mrad jong ka sorkar jylla u la kular ha khmat ka jingialang ba ia ka “Meghalaya Piggery Mission” kaba T.220 klur tyngka yn pynlait noh hapoh shibnai.
Ha dien ba u la sngap ia ka jingud jong ki nongri jingri bad ki jingeh kiba la pynpaw da ki Doktor jong ka tnad ri mrad, u myntri khynnah ka sorkar pdeng u la ong ba, ka jingduna jong ki doktor mrad ka long ha Ri India baroh kawei, ban iarap ia kane u la kyntu ba ka sorkar ka dei ban phah ia ki briew ban shah hikai lai bnai ka sorkar pdeng kan bei ia jinglut.
Haba ia dei bad ka jingduna jong ki jaka ai jingsumar ia ki mrad u la ong ba ka sorkar jylla ka dei ban phah ia ka jingpan jingiarap sha ka sorkar pdeng, haba ia dei bad ki jaka wad bniah “Laboratory” ia kine ruh ka sorkar jylla ka dei ban phah ia ka skhim sha ka sorkar pdeng.
Haba ia dei bad ka jingud jong ki nongri jingri ba ki jingbam ki long kiba la kiew dor palat na ka liang jong u myntri u la ong ba un sa ia kren bad ka ICAR la shai ka sngi kumno ban leh ban pynioh ia ki jingbam kiba duna dor ban im ki nongri jingri.
Haba ia dei bad ka jingong ba pynioh ia ki dawai inject ban pynthikna ba ki masi kin kha da ki masi kynthei na liang jong u myntri u la ong ba ka sorkar India ka dang iaid sha khmat ha kaba dei bad kane bad leh se shen yn sa lah ban leh.
Na ka liang jong u myntri u la ai ka jingkular ba kum u myntri jong ka sorkar pdeng un iarap katba lah na ka bynta ka jylla Meghalaya namar ha kane ka jylla ka don ka lad ban pynkiew ia ka kam ri jingri la ong u myntri.
Ha kane ka sngi kiba la don lang ki long u Secretary ka tnad Ri Mrad jong ka sorkar jylla u Dr C Manjunatha, ki doktor bad ki nongrei jingri na kylleng ka nongbah Shillong, kiba bun ki dei na upper Shillong bad Mawlai. U myntri u la leit ban jngoh ruh ia ka jaka ri jingri ka sorkar ha Upper Shillong bad ia ka jaka buh Dud ha Mawiong.
