Shillong, Jylliew 03: U myntri rangbah ka jylla u Conrad K Sangma mynta ka sngi u la leit ban jngoh ia ka Nongpoh Civil Hospital shuwa ba un lum ia ka jingialang jong ki ophisar ka tnad ka koit ka khiah, ha ka jingiadon lang u myntri ka koit ka khiah u Bah AL Hek.
Ha ka jingkren jong u Myntri rangbah ka jingialang u la ong ba kane ka sorkar kala buh ia ka thong kaba ha khmat eh na ka bynta ka koit ka khiah bad ia ka rukom trei kam na ka bynta ban ai jingsumar ia ki paidbah. La ong ba ka sorkar kan pynioh dawai ei ha ki jaka sumar jong ka sorkar.
Kane ka jingleit ban jngoh ia ki jaka ai jingsumar na ka liang jong u myntri rangbah ka long ban lap ia ki jingshisha ha kaba ia dei bad ka koit ka khiah. Na ka liang jong ka sorkar kan dang pynbun shuh shuh ia ki nongtrei bad kum juh ia ki jaka sumar na ka bynta ki paidbah.
Ha kaba ia dei bad ka Hospital ha Nongpoh na ka liang jong u myntri rangbah u la ong ba kane ka jaka sumar ka dang dun ha ki jaka ban pdiang ia ki nongpang bad u la ong ia ka tnad ka koit ka khiah ban wad ki lad kumno ban pynheh ia ki jaka thaih jong ki nongpang. Haba ia dei bad ka MHIS u la ong ba ka sorkar ka leh ia kane da kaba sani bha.
Ka sorkar kan pyniaid noh da ka online na ka bynta ban pan dawai sha ki District Hospital, CHCs, PHCs bad ki sub centre. Ia kane yn leh noh hapoh kine ki khyndait bnai, la ong ba ia ka “Trauma Centre” kaba khlem trei kam mynta la palat phew snem ha kane ka hospital sorkar yn pyntrei kam noh hapoh ka 45 sngi. Ha kane ka jingialang la don lang ruh u MLA jong ka Nongpoh bad u ka DC jong ka Ri Bhoi District.
