Union Home Minister Amit Shah along with other Ministers inaugurates the Inter State Bus Terminus at Mawiong on Saturday. (Photo by Sanjib Bhattacharjee).
Shillong, Iaiong 01: Ka seng HYC Mawlai kala phah da ka jignthoh sha u mytnri ba dei peit ia ka tnad Transport bad ha kane ka shithi kala dawa ba ynda plie ia ka Inter State Bus Terminus ha Mawiongrim ia ki dukan bad ki iing basa dei ban ai sha ki trai jylla.
Ka shithi kaba la phah da ka HYC jong ka shnat Mawlai kala kdew ba ki don bun bah ki khun samla trai ri- trai muluk kiba la nang la stad bad biang ka kyrdan pule ki mad ia ka jingeh jong ka kyrduh kam- kyrduh jam.
Haduh mynta, dang duna eh ki lad ai kam ai jam na ka liang ka sorkar jylla na bynta ki samla wadkam-wadjam. Ba ka ioh ka kot , ka khaii pateng ka dang duna bad sahdien eh ha ka jylla jong ngi lada ia nujor bad kiwei pat ki jylla.
Ka HYC kala kdew ba bun ki briew na kiwei pat ki jylla ki ioh laitlan eh ban treikam bad khaii ha kane ka jylla ka jong ngi khlem kano kano ka jing-tehlakam da ki bor Sorkar , bad kane ka buh jingeh bad pynduh jingkyrmen ia kiba bun ki nongtreikam trai ri-trai muluk ban trei ia ki kam bapher bapher.
Ka HYC ka tip ba shen yn sa plie noh ia ka ISBT ha Mawiong Rim ia kaba bun ki dukan, ki ing shong basa( lada don) ba kiwei kiwei ki kam yn sa ai wai. Bad kane ka long kum ka lad ai kam ai jam ia kiba bun ki nongwad kam bad ki nongtrei kam ym tang ha ka thain Mawlai hynrei na kiwei pat ki jaka ruh kumjuh.
Halor kitei ki jingshisha ba la pynpaw haneng ka Hynniewtrep Youths’ Council Mawlai Circle ka ai jingmut ka ai jingmut sha ka sorkar ba baroh ki nongshim wai ia ki dukan bapher bapher, ki (Guest House) ing shong basa bad kiwei kiwei ki jait kam dei ban ai tang ia ki trai ri-trai muluk.
Ka Meghalaya Transport Corporation ka dei ban da phikir bha ban tehlakam da ki kyndon kiba khlain pyrshah ia u nongshimwai ba umbit ban ai-wai pateng sha ki bar jylla kumba la long ha kiwei pat ki jaka.Ba kam dei ban don kano kano ka jingai kam ne pyntreikam da ki briew ki bym dei ki trai ri-trai muluk bad ba baroh ki jait kam dei ban ai tang ia ki trai ri-trai muluk.
Ka Hynniewtrep Youths’ Council, Mawlai Circle , ka thrang , ka angnud ba ka iohkam iohjam, ka trei ka ktah bad ka ioh ka kot kan kiew ha ka jylla ka jong ngi khamtam eh na ka bynta ki tri ri-trai muluk. Kumta ngi kyrpad ia ka jingiatreilang ka jong phi khnang ba kan pynhun bad pyn sngewtynnad ia uba bun ba lang, ia kane ka shithi la soi da u Donboklang Kharlyngdoh President ka HYC Mawlai.
