Guwhati, Iaiong 09: Ia ka jingialang pdeng snem jong ka executive committee ka Commonwealth Parliamentary Association (CPA) la pynlong ha ka iing dorbar thaw ain jong ka Assam mynta ka sngi.
Ki nongmihkhmatna 53 tylli ki ri Commonwealth, ia kiba la phiah hapdeng khyndai tylli ki thain jong ka Commonwealth ki la iashim bynta ha kane ka jingialang.
U Shongknor ka iing dorbar thaw ain LokSabha, u Om Birla u la plie ia kane ka jingialang mynta ka sngi ha ryngkat ka jingiadon lang u Myntri Rangbah ka Assam, u Dr.Himanta Biswa Sarma.
Haba plieia kane ka jingialang, u Om Birla u la ong ba ka bynta jong ka Commonwealth Parliamentary Association ban wanrah ia ka jinglong kaba thymmai ha ka synshar paidbah ka dei kaba dei ban ai jingiaroh.
U la ong ba ka India ka don ha ka jaka kaba kyrpang hapdeng ki ri ba synsharpaidbah namar ka don ia ka jingkhlain naduh ki Gram Panchayat haduh ka iing dorbar thaw ain Parliament bad ba ka synsharpaidbah ka dei ka jinglong tynrai jong ka rukom im jong ngi.
Ha ka jingkren jong u, u Shongknor ka Lok Sabha u la ong ba ha kine ki 75 snem ka jinglaitluid, ka synsharpaidbah jong ka India ka la kham khlain katba dang iaid ki snem bad ka jingshaniah ki briew ha ka synsharpaidbah ka dang kiew katba dang iaid ka por.
U Birla u la ong ruh ba ka India kan kot sha ki thong Sustainable Development Goal shuwa u snem 2030. U la ong ba ki ri Commonwealth ki dei ban iatrei lang sha kajuh ka thong na ka bynta ka jingbha ki briew bad ba ia ki kam hapdeng ki ri dei ban pynbeit lyngba ka jingiakren.
U shongknor ba shipor jong ka CPA Executive Committee, u Ian Liddell-Grainger, MP, jong ka iing dorbar thaw ain Parliament jong ka UK u la ong ba ka CPA ka plie shibun ki lad ia ki MP bad kito kiba trei bad ki ba kin iatrei lang ha ki kam bad ban iasam ia ki rukom treikam kiba baing tam.
U la ong ruh ba ka CPA ka trei ban pynskhem ia ka jingkut jingmut ka commonwealth ban kot sha ki kliar jong ka rukom synsharpaidbah bad ka parliament. U Myntri rangbah ka Assam, u Dr.Himanta Biswa Sarma u la ong ba u sngewnguh ia u Shongknor ka Lok Sabha uba la plie lad ban pynlong ia kane ka jingialang ha Assam kaba long ruh ka sien kaba nyngkong ban pynlong ia kane ha ka ri India.
Ka jingialang CPA Executive ka ju long ar sien shi snem ha kaba la iashim bynta da ki ophisar CPA Officers bad ki nongmihkhmatna ki khyndai tylli ki thain ka CPA. Hadien kane ka jingialang, ia ka CPA India Region conference kaba phra yn pynlong ha Guwahati ha ka 11 bad 12 tarik u Iaiong.
