Shillong, Kyllalyngkot 18: U myntri rangbah ka jylla Meghalaya u Conrad K Sangma bad ka kynhun MDA mynta ka sngi kila ia kynduh ia u myntri kam poh iing jong ka sorkar pdeng u Rajnath Singh bad kila ia kren halor ka jingshah khang dewiong ha kane ka jylla Meghalaya.
Ha kane ka jingiakren la don lang ruh ki ophisar na ka tnad kampoh iing jong ka sorkar pdeng bad na ka tnad marpoh khyndew jong ka sorkar jylla. Ha kane ka jingiakren u myntri rangbah ka jylla u la ong ba don kam ban pynbeit ia ka jingtih dewiong ha kane ka jylla.
U Myntri rangbah ka jylla ula ong ia u myntri kam poh iing ka sorkar pdeng ba ka jingkhangtih dewiong kala ktah ia kaioh ka kot jong ki paidbah bad kumjuh ia ka jingioh jong ka sorkar jylla. Ha kane ka jingiakynduh na ka liang jong u myntri kam poh iing ka sorkar pdeng u Rajnath u la pynpaw ia ka jingsngew khia halor kane ka kam khangtih dewiong.
U Secretary ba dei peit ia ka tnad marpoh khyndew jong ka jylla Meghalaya u C. Manjunath, u la ai ia ka jingbatai ha khmat jong u myntri kam poh iing ka sorkar pdeng ka jinglong ka kam dewiong ha kane ka jylla bad ia ka hok nongkynti bad ia ki jingeh kiba mih na kane ka jingkhang tih dewiong.
Ha kane ka jingiakynduh mynta ka sngi la pynsngewthuh sha u myntri kam poh iing ka sorkar pdeng ba la don kam ia ka jingpynbna jong u president ka Ri India katkum ka paragraph 12A (b) jong ka 6th Schedule jong ka Riti synshar jong ka Ri kiba don hapoh ki kyndon jong ka ain Mine bad Minerals (Development & Regulation) Act 1957.
Ha kane ka jingiakren u myntri rangbah ka jylla u Conrad K Sangma, u la ai ka jingkular ia u myntri kam poh iing ka sorkar pdeng ba ka sorkar jylla kan but ia ki kyndon ban iada ia ka mariang bad ia ki lad jingiada lada pynlait ia kane ka jingkhang tih dewiong ha Meghalaya. La ong ba ia ka “technical committee” kaba la thaw da ka sorkar jylla yn don u wei u nongmihkhmat na ka sorkar pdeng bad ka sorkar pdeng ka lah ban wan jurip ha kano kano ka por ia ki jaka tih dewiong.
U myntri kampoh iing ka sorkar pdeng u la sngap bha ia ka jingbatai bad u la ong ba un sa peit bniah ia kine kiei kiei baroh ha kaba ia dei bad kane ka jingkhang dewiong ha kane ka jylla Meghalaya.
