Shillong, Jymmang 12: U myntri rangbah ka jylla u Conrad K Sangma mynta ka sngi u la ia kynduh ia u myntri ka koit ka khiah jong ka sorkar pdeng u J.P Nadda bad ha kane ka jingiakynduh u la ai ia ka dorkhas ban pan na ka sorkar pdeng ba kan ai ka bor ban peit da lade ia ka North East Indira Gandhi Regional Institute of Health and Medical Science (NEIGRIHMS), Shillong.
Ha kane ka jingiakren na ka liang jong u myntri ka sorkar pdeng ba dei peit ia tnad ka koit ka khiah u la ai ka jingkular ba un sa peit ia kane ka jingkyrpad ban ai ia ka bor ban peit da la de sha ka NEIGRIHMS bad kane kan iarap shibun na ka bynta kan pynkiew ia kane ka jaka ai jingsumar na ka bynta ki paidbah kane ka dong shatei lam mih ngi jong ka Ri India.
U Myntri rangbah ka jylla Meghalaya u la ong ba lada la ai ia ka bor sha ka NEIGRIHMS ba kan peit da la de kane kan iarap ban kyntiew ia ka rukom ai jingsumar ia ki briew jong ka jylla bad kum juh ia kane ka dong ka thain. Ha kane ka jingiakynduh u Conrad u la kren ruh ia ka phang ba shah pynduh ia ka jingpule MBBS ha NEIGRIHMS bad ia ki jingsiew kiba dang sah bad ki tnad bapher bapher hapoh jong ka sorkar pdeng.
Halor kane ka jingshah pynduh ia ka jingpule MBBS hapoh jong kane ka hospital, na ka liang jong u myntri ka koit ka khiah jong ka sorkar pdeng u la ai ka jingkular ba un sa shim khia ban pynbeit ia kane ka jingeh ban ai noh ia ka jingithuh ia ka NEIGRIHMS kum kawei na ki jaka pule doctor bad ban pynlait noh ia ki jingsiew jong ki tnad bapher bapher la kular u myntri ka sorkar pdeng, la iathuh u Conrad.
Na ka liang jong u myntri rangbah ka jylla Meghalaya u la ong ba kane ka jingiakynduh ka long kaba jop namar na ka liang jong u myntri ka sorkar pdeng u la kular ban peit ia ka jingdon kam ka dong ka thain shatei lam mih ngi jong ka Ri India bad ka jylla Meghalaya ha kaba ia dei bad ka koit ka khiah.
Ha kane ka jingiakynduh la don lang u myntri ka koit ka khiah jong ka jylla Manipur u Jayanta Kumar. La ia kren ruh ha kane ka jingiakynduh ban buh ia ka jingpule doctor ha ka kyrdan Postgraduate hapoh jong ka NEIGRIHMS na ka bynta ka jingmyntoi kane ka thain baroh kawei. Ia ka NEIGRIHMS la seng halor ka nongrim ba kan ia ryngkat kyrdan bad ka hospital AIIMS ha New Delhi, ka PGIMER, Chandigarh. Dang shen ka sorkar pdeng kala pynbna ban shna ia ki hospital ha kylleng ka ri ha ka kyrdan jong ka AIIMS bad kawei kan don ha Assam.
