Shillong, Naiwieng 21: Mynta ka sngi ka seng Mawmluh Chera Cement Limited Employees Union (MCCLEU) kila pynsngew ba kum ki nongtrei jong katei ka karkhana dewbilat kaba la pyniaid da ka sorkar kila ia kynduh ka jingeh kaba khraw namar la phra bnai mynta kim shym ioh ia ka tulop ka jong ki.
U Bah S Diengdoh President jong ka MCCLEU haba kren ha ki lad pathai khubor mynta ka sngi ha Shillong Press Club u la ong ba na ka liang jong ka seng kila phah sha ka sorkar ia ki khatsaw tylli ki mat jong dawa namar ka jingbym ioh ka jong ki ia ka tulop mynta ka phra bnai lynter.
U Bah S. Diengdoh u la iathuh hadien ba la pynthymmai ia ki nongkitkam jong ka Union mynta u snem, ka la bud dien ia ki mat jingdawa da kaba ia kynduh u Managing Director bad ia u General Manager jong kane ka karkhana pynmih dewbilat jong ka sorkar Jylla kaba la pang swai na ka daw ka jingbym pynthymmai ia ka jingtreikam kaba la pynsyrtok pat ia ki nongtrei kiba treiha kane ka Karkhana.
La iathuh ruh ba ka jingeh kaba ki nongtrei ki ia kynduh ka long ia ka jingbym siew jong ka MCCL ia ka bai trei kaba kila trei tam na ka por ba la buh nalor ba kim ioh ia ka tulop jong ki. Na ka liang jong ka MCCLEU kala kynnoh ba kane ka jingeh ka mih ka dei na ka jingbym biang ki nongpyniaid ia kane ka karkhana pynmih dewbilat kaba dei ka pliang ja jong ki nong Sohra.
