Shillong, Nailur 25: U bah AL Hek myntri ba dei peit ia ka koit ka khiah jong ka sorkar jylla u ba dei ruh u MLA ka thain Golflink u la iathuh ba mynta ka sngi kala don ka jingiakynduh jong ka High Level Committee (HLC) hapoh ka jingpyniaid jong u symbut myntri rangbah u Bah Prestone Tynsong ban ia kren kumno ban weng noh ia ki surok kiba iaid lyngba ka madan Golflink shuwa ka national games 2022.
Haba kren ha ki lad pathai khubor mynta ka sngi ha dien ka jingiakynduh jong ka HLC, u bah AL Hek ba dei MLA jong katei ka jaka la ong ba mynta ka PWD kala pynkhreh ban wad jaka ban shna surok na shawei lada pynduh noh ia ki ar tylli ki surok kiba iaid na pdeng ka Golf Course.
Katkum ka jingpynkhreh jong ka PWD, ka long ba lada pynduh noh ia ki ar tylli ki surok ba don mynta, la hap ban shna, kawei na Police Training School ban poi sha khmat jong ka Hawkers market ha bad na Public Training School sha Forest Colony, ia kine ki surok ym tip kum ki surok bye pass.
Naka bynta ki paidbah ban ia lehkai ka dang don ka jaka kumba 8 akar ei ei, ia kane ka jaka ym shna na ka bynta ki jingialehkai ki khynnah bad ka jaka bam khana, ka jingleh ia ka long ba ka jingialehkai Golf ka dei kawei na ki jingialehkai ha ka National Games.
Ha kane ka jingiakynduh jong ka HLC mynta ka sngi la bethah iaka PWD ba kan pynkhreh ia ka “Detail Project Report” ha dien ba la ioh ia ka jingpynkhreh na ka PWD ynsa lah ban tip katno ka jinglut na ka bynta ban leh ia kane ka kam, la ong u Bah AL Hek.
