Shillong, Lber 03: ka jingiakynduhlang baroh ki seng riewlum hapoh jong ka lama “Regional Democratic Alliance: (RDA) kala long mynta ka miet ha iing jong u president ka UDP u Dr Donkupar Roy ban ia kren ha kaba ia dei bad ka jingthaw ia ka Ececutive Committee hapoh jong ka KHADC.
Katkum ka jingjop jong ki MDC ha kane ka ilekshon kaba dang shu dep ban niew vote ha sngi Saitjian, ka UDP 6, HSPDP 2, PDF 1 bad ka jingleit rung jong u kyrtong shimmet na Mawlai u bah Teiborlang Pathaw sha ka UDP kala pynlong ba kane ka kynhun kan don 10 ngut ki MDC.
Wat la haduh mynta ka sngi ki ar ngut ki kyrtong shimet ym pat don kano kano ka jingtip sha ei kin ai ia ka jingkyrshan jong ki, u Bah Lambor Malngiang bad u Bah Latiplang Kharkongor, hynrei la sngewthuh ba kine kin dang lang bad ka kynhun MDA.
Kumba ka long mynta ka party NPP kala jop 7 ngut ki MDC, ka kynhun MDA kila ioh ia ka jingbun paid hapoh jong ka KHADC ban thaw ia ka Executive Committee. Ka NPP ka don 7 ngut ki MDC bad ka kynhun RDA ka 10 ngut ki MDC kila kot sha ka 17 ngut ha kaba ki la lah ban thaw ia ka EC.
Haka iing dorbar kaba 30 ngut ki MDC ban ioh thaw ia ka EC don kam ia ka jingiatreilang jong ki 16 ngut ki MDC ban ioh ia ka jingbun paid bad ha kane ka kynti kaba mynta ka kynhun MDA kaba don ha ka sorkar kala don 17 ngut ki MDC bad kila lah ban thaw ia ka EC.
