Shillong, Risaw 01: Da ki jingsngewkhia haba ia dei bad ka surok na Ladmawreng sha Ranikor ki saw ngut ki MLA kiba dei iaid lyngba kane ka surok, u bah SK Sunn MLA ka Mawphlang, bah Himalaya Shangpliang Mawsynram kiba hap hapoh jong ka East Khasi Hills District, u bah Renikton Tongkhar Mawkyrwat bad u bah Pious Marwein Ranikor kila leit ban ia kynduh ia u myntri rangbah ka jylla u Conrad K Sangma mynta ka sngi.
Haba kren ha ki lad pathai khubor ha dien ka jingiakynduh ia u myntri rangbah ka jylla u bah SK Sunn u la ong ba ia kane ka surok ka National Highway Indian Development Corporation Limited (NHIDCL) kala dep khot ia ka tender ban shna ia ka Detail Project report (DPR) ha u snem 2018, hynrei kaba lyngngoh ka long ba haduh mynta pat kam pat khot ia ka tender ban sdang ia ka jingtrei.
U bah Sunn u la ong ba na ka jingiakren bad u myntri rangbah mynta ka sngi kala pawshai ba ka jingbymkhot ia ka tender ban trei ka long ba ka NHIDCL haduh mynta kam pat ioh ia ka jingshai na ka tnad shna surok jong ka sorkar pdeng ia ka rukom bei pisa ha kaba ia dei bad kane ka surok.
Na ka liang jong kitei ki saw ngut ki MLA kila ban jur ia u myntri rangbah ba ka sorkar jylla ka dei ban shim khia ha kaba ia dei bad kane ka surok, kila ong ruh ba lada ka sorkar jylla kam shim khia na ka liang jong ka sorkar pdeng kan pynslem. Kane ka surok ka long kaba don kam ia ki briew namar ka poi sha duh Baghmara.
Ha kane ka jingiakynduh ka long ban dawa na sorkar ba ka dei ban ithuh noh ia kane ka surok kum ka National Highway, na Lad Mawreng sha Ranikor ba iaid lyngba ka Mawkyrwat, katba ia ka surok na Weiloi sha Balat ka sorkar dang phah ia ka skhim sha ka sorkar pdeng kum ba la ai jingmut da u MLA jong ka Mawsynram u bah Himalaya Shangpliang.
Ha kane ka jingiakynduh na ka liang jong u Myntri rangbah ka jylla u Cornad K Sangma u la pynsngew ha kine ki MLA ba ka sorkar jylla kala shim khia ia kane ka surok bad ka jingiakren bad ka sorkar pdeng pdeng ka dang iaid haduh mynta bad ka jingeh ka dei tang ia ka rukom bei pisa la ong u myntri rangbah.
