Shillong, Lber 18: U myntri rangbah ka jylla U Conrad K Sangma lem bad ka khynhun myntri mynta ka sngi kila ia kynduh ia u mynri pla pisa jong ka sorkar pdeng u Arun Jaitley ha iing sah jong u ha nongbah Delhi.
Ha kane ka jingiakynduh na ka liang jong u myntri rangbah ka jylla u Conrad K Sangma, u la ia kren bad u myntri ka sorkar pdeng ban buh ia ka Information Technology Hub ha kane ka jylla Meghalaya, jaka shna pynmih jingbam bad ban buh ia ka jylla Meghalaya kum kawei na ki jaka jngoh kai pyrthei na ka bynta ban kyntiew ia ka ioh ka kot jong ka jylla Meghalaya.
Na ka liang jong ki myntri kiba la ia don lang bad u mytnri rangbah ka jylla u Conrad Sangma ban ia kynduh ia u myntri pla pisa jong ka sorkar pdeng ki long u Bah Banteidor Lyngdoh, Kyrmen Shylla, Prestone Tynsong, Sngiawbhalang Dhar, Bah AL Hek bad u Bah Samlin Malniang bad kiwei dei ki MLA.
Ha kane ka jingiakynduh na ka liang jong u myntri kam pla pisa jong ka sorkar pdeng u la pynsngew ia ka jingduna ki jylla ka dong shatei lam mih ngi jong ka Ri India ha ki ba bun ki liang, na ka liang jong ka sorkar pdeng kan iarap na ka bynta ban kyntiew ia kine ki jylla. La ong ba lada ka sorkar pdeng ka ong ba ki jylla ka NE kin im na ka jingmih kaba ki don kane buh ia ka jingeh dei na kane ka daw ba ka sorkar pdeng ka peit kyrpang ia kine ki jylla ba kin kiew ha ki liang baroh.
La ong kuba ka long mynta ka jylla Assam kala sdang ban leit suki suki na kane ka jingduna, na ka liang jong u myntri ka pla pisa jong ka sorkar pdeng u la bethah ia kane ka kynhun myntri jong ka jylla Meghalaya ba kin pynkhreh ia ki skhim bad kin phah sha ka sorkar pdeng bad na ka liang jong ka sorkar pdeng ka long kaba kloi ban iarap.
Haba ia dei bad ka National Games ka ban long ha u snem 2022 la ia kren kane ka phang bad ka jingiakren kala neh kumba 30 minit. Ha kane ka jingiakynduh la ia kren ruh ban buh ia ki jaka hiar Helicopter ha ki lai tylli ki jaka ha kane ka jylla Meghalaya bad ia kine ki jaka shen ym sa plie noh.
Haba ia dei bad ka lynti rel ka sorkar ka don ka jingthmu hynrei ka jingeh ka long ba ki seng bhalang ki pyrshah ia ka lynti rel. Na ka liang jong u myntri rangbah u la ong ba ka sorkar kan sa ia kren bad ki seng bhalang halor kane ka phang la ong u myntri rangbah ka jylla u Conrad.
