Jowai, Nohprah 14: Ka Society of Urban and Rural Empowerment (SURE), Jowai da ka jingiatreilang bad ka kynhun North East Slow Food bad Agro-biodiversity Society, Shillong, kala pynlong ia ka jingiakop shet ha ki jingbam tynrai ha shnong Tyrchang ha Jowai.
Ki lai ngut ki nongshet kiba la wan na ri Thailand ki long u Nutdanai Trakansuphakon, Yuttapan Phiphatmongkhonkun bad Kanlaya Chermue kiba dei ruh kiba juh ia treilang bad ka NESFAS, Shillong. Ka jingpoi jong ki sha Tyrchang, ka long ban pynshlur ia ka rukom shet ha ka bam tynrai bad ha kajuh ka por ban ia shim mar kylliang ia ka rukom shet tynrai jong ki nong Thailand bad ki Pnar.
Shuwa ban pynlong ia kane ka jingiapyni iala ki jong ki jong ki rukom shet tynrai kala don ka jingiamir jingmut ba kumno ban pyndon kam ia ki jingbam kiba lah ban ioh na ki khlaw kiba lah ban bam. Ia ki jingbam kiba la pyndon kam ha kane ka sngi ban shet la leit ban wad na khlaw ha katei ka juh ka sngi lem bad kitei ki nong Thailand.
Ha kane ka sngi kine ki nong Thailand kila pyni ia ka rukom shet jong ki ia ki jingbam kiba lah ban ioh na khlaw. Ha kane ka sngi ym shym la lah ban ioh ia ki jait jingbam namar kadei ka por tlang ha kaba ki jingthung kila tyrkhong. Ha kane ka sngi ka rukom shet ka long ar bynta ka jinghikai kaba mar kylliang bad ka jingiakylliang ia ki jingbam kiba la dep shet hapdeng ki briew na Thailand bad ki Pnar.
