Shillong, Lber 03: Ka kynhun United Democratic Alliance (UDA) hapoh jong ka KHADC kala ia kynduh sa kawei ka jingeh ha kaba saw ngut ki MDC kila thoh sha u lamphang jong ka sorkar Meghalaya Democrati
c Alliance (MDA) ban ujor halor ka jingjied nongialam hapoh KHADC kaba la shu leh lyndet da ka Party UDP.
Kine ki saw ngut ki MDC kiba la phah ia kane ka shithi ha ka 02/03/2020 sah u lamphang ka kynhun MDA ki long u bah Lambor Malangniang MDC shimet, u bah Martle Mukhim MDC ka HSPDP, Bah Batskhem Ryntathiang MDC bala mih na ka Congress bad u Bah Sherborlang Mawlong MDC HSPDP.
Ha kashithi kaba la phah kila pynpaw ba ka long kaei kaei kaba don kam ba ia u nongialam jong ka UDA dei ban jied da ki para MDC ym da ka party UDP. Ha ka shithi kila pynpaw ba dei ban ai lat ia ki MDC ban jied ia u nongialam da ki para MDC ba un long u CEM ha KHADC.
Kitei ki saw ngut ki MDC kila kdew ba ki nongialam jong ka MDA kila shu pyntip sha ki ba ia ka kam CEM ha KHADC ka dei ka bhah jong ka UDP, katkum katei ka jingpynbeit ka paw ba ban jied ia u CEM ha KHADC dei tang ki MDC jong ka UDP, ia kane kila kohnguh bad pdiang hynrei tang hapoh khyndait bnai ki jingeh kila mih bad kala wan rah ia ka jingkhyllem ka EC.
Ka jingkhyllem ka Executive Committee ha ka 22/11/2019 bad mynta kala dap lai bnai hynrei ym shym la lah ban leh ei ei, kitei ki saw ngut ki MDC kila kynnoh ba ka jingbym lah ban leh ei ei ka dei na ka daw ba khlem ailad ia ki para MDC ban jied ia u nongialam jong ki.
