Shillong, Risaw 23: U kyrtong ka Khun Hynniewtrep National Awkening Movement (KHNAM) na Mawlai constituency, u Bah Ban L Nongbri, watla um shym la long u nongmihkhmat ka thaiñ, hynrei u la leh ia ki kam kiba bun kum u nongmihkhmat haba ia dei bad ka jingsbun mynsiem jong u ban nohsynniang sha ka thain bad um shym la peit than tang ban ioh vote, namarba ki don ki dong kiba la ioh ia ka jingiarap na u, kiba don tang ar lai iing.
Ha kane ka kynti u Bah BL.Nongbri u la nohsynniang sa da ka kor pynsawa ne sound system stranger sha ka shnong Mawiong Rim Block 4 ha ka 19 tarik u Risaw, 2017 ba la ai lyngba u Rangbah Shnong ha ryngkat ka jingdon lang u secretary Shnong, ki dkhot committee jong ka shnong, ki Rangbah Dong,secretary dong, dkhot jong ka Committe jng ka dong bad kiwei kiwei.
Ha ka juh ka por u la wanrah iaka project report ban kyntiew ia ka View Point kaba don ha Ryndang briew Mawiong Rim. U la pynpaw ba kane ka jingnoh synniang jong u ia ka Shnong Mawiong Rim ka long shi bynta ban ai jingiarap na ka bynta ka jingdonkam jong ka shnong ha ka ban pyndonkam ha iing iap briew, meeting shnong bad kiwei kiwei.
“Namar hadien ba la wan ban pynsngew da ki nongkitkam Shnong ia ki jingdonkam, kum u samla ba don ka jingkitkhlieh ngam lah ban shu sngap ne shong kli kti khlem da leh eiei. Kumta mardor nga la noh ia kane ka jingiarap,” ong u Bah Ban bad u la bynrap,
La ong “ Ba ka jingangnud jong nga, lada nga jop ka long ban wanrah iaka good governance lane ka sorkar ba bha lyngba ka iing dorbar thaw Ain, ban wanrah iaka jing myntoi ia ki paidbah jong ka Thain bad jylla lyngba ki policy ban shna, kum uta u MLA u ban pynmyntoi ia ki briew kiba bun ka jingeh bad jingjynjar haka imlang sahlang”.
