Shillong, Risaw 5: Ha dien ar snem jong ka khlam COVID-19 positive mynta u snem ki paid riew ngeit Hindu ha Meghalya kila ioh ban leh kmen ia kane ka leh niam Durga Puja ha ka rukom kaba kham ishongkun namar kam shym don shuh kata ka jingbuh kyndon na ka liang jong ki bor sorkar.
Kane ka jinglehniam kala sdang ha ka 01/10/2022 bad la pynkut mynta ka sngi ka 5/10/2022 da ka jingnoh blei, ha ki jaka bapher bapher kiba la buh ryntih da ka sorkar bad ha Shillong la noh blei ha Wahumkhrah Shillong ha kaba ki paid riewngeit hindu kila ia shim bynta shitrehem.
Ki bor pyniaid jong ki District Administration kila buh ia ki lat jingiada ha baroh ki jaka noh blei ban peit ba kan nym don kano kano ka jingjia kaba sngewsih,ha nongbah Shillong ha ka jaka bret blei la ioh ba la don ki magistrate bad ki dkhot ka Central Puja Committee ban peit ba kan iaid beit ka jingnoh blei.
Ha kine ki saw sngi jong ka jinglehniam Puja la iohi ia ka jingshongshit ha kaba ki riew ngeit Hindu kila ioh ban leit jngoh na kawei ka pandan sha kawei pat ka pandal, kala don ruh ia ka jingiakop tem drum bad ka jinglehniam kala iaid beit haduh mynta sngi bala pyndep ia baroh ki jinglehniam da kaba noh blei.
