Shillong, Jymmang 24: Mynta ka sngi ka kynhun “Future Youth Organization” ryngkat ki khynnah skul jong kane ka sor Shillong kila pynlong ia ka jingiaid paidbah ha ki bynta jong kane ka nongbah Shillong ban pynsngewthuh ia ki paidbah halor ka jingdon kam ban pynneh ia ka mariang.
Ka jingthmu jong kane ka jingiaid paidbah ka long ban pynsngewthuh ia ka jingkylla ka mariang bad ban wad ki lad ki lynti ban pynneh pynsah ia ka mariang namar kum ba ka long mynta ka jingkylla ka mariang ka long jubor ha kylleng ka pyrthei.
Kane ka jingiaid ka long ruh kum shibynta ban pynpaw sha ka sorkar bad ha ka pyrthei ba baroh ki sorkar ha ki Ri bapher bapher kin shim ia ka rai kaba skhem ba ia leh ban pynneh pynsah ia ka mariang.
Ia kane ka jingiaid paidbah la sdang na Don Bosco Squar bad la pynkut ha State Central Library. Kiba la wan ban ia shim bynta ha kane ka jingiaid paidbah kiba bun ki khynnah skul bad kila rah ia ki plakard ban pynpaw ba ka mariang ka don kam ia ka jingiada.
