Iaid ryntih ka jingpyrshang na ka bynta ka jingai dawai COVID-19 ha ki saw tylli ki jylla

New Delhi, 29  Nohprah: Ka Tnat ka koit ka khiah jong ka Sorkar Pdeng ka la pynlong ia ka jingpyrshang kaba ar sngi na ka bynta ki kam ba iadei bad ka jingai dawai Covid-19 ha ki saw tylli ki jylla ba kynthup ia ka Assam, Andhra Pradesh, Punjab bad Gujarat ha ka 28 bad 29 tarik Nohprah, 2020.

Ha ryngkat ka jingshemphang kaba la ioh na ka jingpyntreikam ia ka Universal Immunization Programme (UIP) bad ka jingpynlong ia ki jingai dawai ha kylleng ka ri ban iada na ki jingpang kum ka measles-rubella (MR) bad ka adult Japanese Encephalitis (JE) campaign, la shim ia ki sienjam kiba donkam ban ai dawai ia ki bynta jong ka imlang sahlang kiba donkam kyrkieh ia ka dawai Covid-19 kum ki nongai jingsumar, kito kiba trei ha ki kam Covid bad kito kiba la palat 50 snem ka rta.

Kane ka jingpyrshang ban ai dawai kalong ruh ka jingpeit bniah ia ki jingdonkam ha kane ka kam bad kan kynthuo ruh ia ki jingpynkhreh katkum ki Kyndon pyntreikam (Operational Guideline); ka jingwanrah ia ki jingdonkam bad ki nongpyndonkam ha ka Co-WIN application, ki jaka ai dawai bad ka jingbuh ia kine ha ki map, ka jingkyntiew jingtip shaphang ki nongai jingsumar, ki jingpynshisha ba la ioh dawai da ki distrik, ki jingpynkhreh ban ai dawai, ka jingphah ia ki kynhun ban ai dawai bad kiwei kiwei ki jingdonkam ha ki jaka ai dawai, ki mock drill kiba iadei bad ka jingai dawai bad ka jingpeit ia ki kam ha ki block, ki distrik bad ki jylla.

Ka jingthmu jong kane ka jingpyrshang kalong ruh ban sngewthuh ia ka jingpyndonkam ia ka rynsan IT Co-WIN ka ban pyni ia ki lad shakhmat shuwa ban ai dawai shisha.

Ki District Collector ha ryngkat ki distrik bad ka block task force ki la bahkhlieh ban pynlong ia kane ka jingpyrshang bad la kyrmen ba kane kan pyni ia ki jingeh kiba lah ban mih haba ai dawai shisha.

Kane ka jingpyrshang kaba ar sngi la pynlong ha ka Krishna distrik jong ka Andhra Pradesh, Rajkot bad Gandhinagar ha Gujarat, Ludhiana bad Shaheed Bhagat Singh Nagar (Nawanshahr) ha Punjab bad Sonitpur bad Nalbari distrik ha Assam.

La thaw ia ki kynhun kyrpang da ki bor distrik bad la trei ia ki kam kum ka jingkyntiew kyrteng jong ki nongioh jingmyntoi, ka jingpynbiang ia ki jaka ai dawai, ka jingai dawai, ka jingai jingtip shaphang ki nongai bad ki nongioh dawai bad kiwei kiwei ki kam.

La peit bniah ruh ia ki jingshem jong kane ka jingpyrshang ha ka 29 tarik Nohprah, 2020 lyngba ka Video conferencing bad ki State & District Programme officer da u Joint Secretary (Public Health). Baroh ki jylla ki la pynsngew ia ka jinghun halor ka rukom pyntreikam bad ka jingpyndonkam ia ka rynsan IT ban pynthikna ia ka jingiaid beit iaid ryntih jong kane ka kam ai dawai ka ban poi sha ki briew kiba bun ha kylleng ka ri. La don ruh katto katne ki jingai jingmut ban pynbha shuh shuh ia kane ka rynsan Co-WIN.

Kine ki jingai jingmut ba la ioh kin iarap ruh ban pynkhlain shuh shuh ia ki kyndon pyntreikam bad ka rynsan IT bad kane kan iarap bha ia ka kam ai dawai Covid-19 ha ka ri.

 

 

What Next?

Recent Articles

Leave a Reply

Submit Comment

*