Shillong, Naiwieng 22: Ha ka jingiakynduh jong u Chief Executive Member jong ka KHADC u Bah Pynshngianlang Syiem bad ki nongialam jong ka seng KSU mynta ka sngi ban ia kren halor ka jingmaramot ia ka surok na Nongstoin sha Wahkaji kumba la klular.
Ha kane ka jingiakren na ka liang jong u Bah Pynshngianlang Syiem u la kren shai ha ki nongialam jong ka KSU ba ka KHADC kala rai ba ia ka pisa kaba la ia kren T.25 klur yn aiti sha ka PWD ba kan pynbha ia kane ka surok bad kane ka bhah pisa kan long noh na ka jingmang pisa jong ka sorkar pdeng kaba dei na u snem 2017-2018.
U president jong ka seng KSU u Bah Lambokstarwell Marngar u la iathuh ba ha kane ka jingiakren bad u CEM ka KHADC mynta ka sngi, na ka liang jong u CEM u la kren shai ba ka mang pisa na kato ka bha jong u snem 2015-2016 kam don shuh hynrei kaei kaba ki mang mynta ka dei na ka bhah jong u snem 2017-2018.
Ha kane ka jingiakynduh na ka liang jong u CEM u la ong ba ka pisa na ka bynta kane kala don hynrei ka jingeh ka long ba ka KHADC kam pat lah ban ai jingkhein ia ka pisa kaba la ioh ha u snem 2015-2016 namar ka jingpynslem palat jong ka sorkar ban pynlait ia ka pisa.
Ha kane ka jingiakren na ka liang jong ka KSU kala kyntu ia u CEM jong ka KHADC ba u dei ban leh kloi noh ia ka kam na ka bynta ban ioh maramot noh ia kane ka surok kumba la ia kular bad ka KHADC kan bei pisa T.25 klur na ka bynta ban maramot ia katei ka sruok na Nongstoin sha Wahkaji.
