Shillong, Nailar 05: Ka Executive Committee jong ka Seng Kur ka Mei-Sin bad ki khun jong ka, kaba la ia kynduh ha Nongthymmai, Shillong ha ka Sngi Saitjain, 6 tarik U Nailur, 2017, ka pynpaw ka jingsngew sarong bad sngew ioh mynsiem ba ki don ki riewkynthei, ki longkmie don burom kum ka Kong Tailin Lyngdoh kiba hangno hangno ba ki don, ki shong ki sah, ki trei ki ktah, la ka dei hapoh la jong ka ri ne sha shiliang duriaw, ki riam ki beit da ka riam Khasi tynrai kaba long ka jainsem, kham pher wat lada shah niew bein kumba la jia ia ka Kong Tailin Lyngdoh kat haduh ban da shah pynmih noh na ka karma bam jong ka Delhi Golf Club, ha kaba ia kane ka jingleh, ka Executive Committee ka pynrem jur.
Hynrei haba phai sha la rympei, hapoh la ka Bri U Hynniewtrep, ka pynlyngngoh bad pynjem rngiew ban iohi ba ia ka ka riam Khasi tynrai, la sdang ban leh klet, lane sngew lehrain ban riam bad khlem pep, ki don bun ki bym tip bad nang kumno ban sem ia ka jainsem, ynnai ia kren ban kup ia ka jainkup. La iohi ba ki ia sngewtynnad bad sngewjuh da ka riam jong kiwei kat haduh ba ki skul ki la phah riam syndon ia ki khynnah skul da kata ka salwar kameez ha ka jaka ban hikai kumno ban sem, kumno ban kup khnang ba ynda ki la dap 17 snem ka rta, kin nang bad tip kumno ban sem noh da ka jainsem ym shuh ban phong tang da ka phrok.
Kumta, ka Executive Committee jong ka Seng Kur ka Mei-Sin bad ki khun jong ka, ka kyrpad bad kyntu jur ban ia bud ia ka nuksa ba bha ba la lam da ka Kong Tailin Lyngdoh bad kiwei ki longkmie kiba kum ma ka, ban sngew sarong bad pynmlien ialade ban riam don burom don akor la ka riam ka beit Khasi tynrai la hapoh la rympei ne shabar kaba long ka riam ka beit kaba da i shongkun, i khia thew bad i shong sbai shong rupa katta katta.
Namarkata, ka kyrpad ruh ia ki kmie ki kpa, ki Department Arts and Culture, Education, Social Welfare, Women’s Commission jong ka Sorkar Meghalaya, ka Khasi Hills Autonomous District Council (KHADC) bad Jaintia Hills Autonomous District Council (JHADC), ki it ki hima bad elaka, ki skul, ki kolej, ki skulbah ba don hapoh ka Bri U Hynnewtrep ba kin pynshlur ia ka ka riam ka beit Khasi kiba don sawdong bad kylleng ka Bri Khynriam, Pnar, Bhoi, War, Lyngngam. Kane kalong katkum ka kyrwoh kaba la phah da u Bah Edward Kurbah, General Secretary Ka Seng Kur ka Mei-Sin.