Shillong, Jymmang 22: Ki nongtrei jong ka Postal Department ha ka kyrdan Gram Dak Sevak (GDS) ha ka Ri India baroh kawei mynta ka sngi kila pynlong ia ka jingiakhih kaba khlem buh por naduh mynta ka sngi ban dawa na ka sorkar pdeng ba dei ban pyntrei kam noh ia ka kaiphot jong ka kommittee ia kaba la tip kumka “Kamlaesh Chandra Committee Report”.
U sikretari ba dei peit ia ka dong shatei lam mih ngi jong ka Ri India u Uttam Chanda, haba kren ha u SP News Agency u la iathuh ba katkum katei ka kaiphot ka long ba ka sorkar pdeng ka dei ban pyntrei kam noh ia ka “Kamlaesh Chandra Committee Report” ha kaba ki long kmie ki dei ban ioh ia ka shuti ha kapor ba ki ioh khun rit, ki nongtrei GDS ki dei ban ioh iaka bai dawai.
Katkum kane ka kaiphot ka long ba ka sorkar ka dei ban ithuh noh ia ki kum ki nongtrei ba pura jong ka Postal Department, ia kane ka kommittee la thung ha ka 1/1/2016 bad ha dien ba kala dep ban leit jurip ha baroh kawei jong ka Ri India kala ai ia ka kaiphot ha ka 22/3/2018 ia kaba ki dawa ba ka sorkar pdeng ka dei ban pyntrei kam noh.
La iathuh ba ha ka Ri India baroh kawei kiba trei ha ka kyrdan GDS ki don lai lak ngut, ha North East India baroh kawei ki don 8000 ngut bad ha Meghalaya ki don 600 ngut. Ka kam kaba ki GDS ki trei ka long ban rah ia ki shithi khamtam eh ha ki shnong nongkyndong kaba ki hap ban iaid da ka kjat.
Ka por ka jylla ha kaba ka jingtrei kam jong ki GDS kam dei shuh tang ban rah shithi hynrei kila hap ban trei ia ki kam ophis baroh kumba long kiba don ha ophis. Dei na kane ka daw ba ki dawa ba dei ban pynkiew noh ia ka tulop jong ki bad ban ithuh ia ki kum ki nongtrei ba pura bad ka iing bishar kaba ha khliehduh jong ka Ri ruh kala dep ban ai ia ka rai ba ka sorkar ka dei ban ithuh ia ki kum ki nongtrei ba pura.
