Shillong, Nailur 05: Ki nonghikai SSA hapoh jong ka lama, All Meghalaya SSA School Teachers Association (AMSSASTA) mynta ka sngi kila pynlong ia ka jingiakhih shong kyllain mungor ka jong ki ha jan Additional Secretariat ban dawa na ka sorkar ba dei ban pynlait noh ia ka tulop jong ki kaba la sah mynta san bnai.
Ha kane ka jingiakhih kaba la long mynta ka sngi kila dawa ruh na ka sorkar ba ka dei kan pynlait noh ia ka pisa kaba la tip kum ka arrear kaba dang sah phra bnai. Kane ka jingiakhih ka jong ki ka long ruh ha ka sngi ba ka Ri India ka rakhe ia ka sngi burom jong ki nonghikai.
Haba kren ha ki nongthoh khubor u Bah L Marngar President jong ka seng, u la ong ba kila jied ia kane ka sngi ba kin pynlong ia ka jingiakhih ka daw ka long ba kane ka dei ka jingeh jong ki nonghikai bad ha ka juh ka por ka dei ka sngi burom ia ki nonghikai.
Kum ka seng ka kwah ban pynsngew ruh sha ka sorkar ba, ka dei ka bynta jong ka sorkar ba ka dei ban siew ia ka bainong ka jong ki namar ba ki la trei ia ka kam, ki tip ba kane ka kam hikai SSA ka dei ka bynta jong ka sorkar pdeng, hynrei ka dei ka bynta jong ka sorkar ruh ba kan wad pisa ban siew ia ka tulop jong ki.
Lada ka long ha kane ka rukom kan poi ka por ba kin shitom ia ki ban leit sha ki kam hikai, namar kum ki briew ki don kam ia ka bam ha iing ha sem. Kum ki nonghikai kim kwah ban pynlong ia ki jingiakhih hynrei ki jingeh ka pynlong ia ki ba kim ban se ban hap ban ia mih madan namar haba don ba pang ha iing ha sem ki hap ban wad ram ban shim dawai.
La pynsngew ruh ba kane ka kam hikai na ka SSA kan kut ha u snem 2020, kum ka seng ka kyntu ia ka sorkar ba ka dei ban shim noh ia ki bad pynrung sha k tnad pule jong ka sorkar jylla namar lada ka kut noh ia kane kam sha ei kin leit namar kila aiti ia lade na ka bynta kane ka kam. Ha kane ka sngi da ki spah ngut ki nonghikai na kylleng ka jylla kila wan ban ia shim bynta ha kane ka jingiakhih.
