Jowai, Nohprah, 14: Ka AJYWO Central Body, ka bym shym la shong kli kti halor ka jingpyndonkam bakla bad kamai spah jong u Krishna Sapkota ia ka Residential Certificate jong ka Shnong Latyrke na ka bynta ban pynrung Aadhaar ia ki briew ba nabar, ka seng mynta ka sngi, ka la ia kynduh ia u ADC jong ka EJHD, u Bah SS Syiemleh, MCS ha ryngkat ki mat jingdawa ba dei ban weng noh ia baroh kito ki ba la pynrung kyrteng lyngba ka sertiphiket thok ba la die da u tei u Nepali bad ruh ban pynshitom ia baroh kito ki ba la leh thok tang ban ioh bsuh khlieh ha ka Aadhaar.
U Ba M H Dkhar President jong ka AJYWO Central Body, u la ong, “Ha ka jingiakynduh jong ngi mynta sngi ia u ADC ka EJHD, u bah SS Syiemlieh, ngi la buh ia shibun ki mat jingdawa halor ka rukom pynrung kyrteng Aadhaar . Ki katto katne na kita, ki long ba ba dei ban pynrung tang ia ki briew trai ri trai muluk jong ngi hi lada ki mon, katba ia ki barjylla, ai kin mat leit leh Aadhaar hi ia lade sha la ki jong ki shnong. Lada ki briew jong ngi ki ba sah shabar jylla ki hap wan leh Aadhaar haduh shane, balei ngi ruh ngim lah ban leh ia ba nabar kumta khnang ba ka jingpynrung kyrteng Aadhhaar kan ym don jingktah ia Ri bad ka Jaidbynriew hadien ha bud.”.
Shuh shuh utei u nongialam ka AJYWO u la ong ba nalor ka EPIC, dei ban pdiang tang ia ki Residential Certificate ba la ai da ki Waheh Shong na ka bynta katei ka kam bad ba baroh kitei ki kot ki sla dei ban da attest da ki sahep sorkar ba la pynkup bor bad ba ha ka por ba attest dei ban pan bad ia ki orijinal lym kumta ym bit ban attest bad ruh ba lada lap ia kino kino ki kot ba i don jingsuba eiei ha ka por ba leh attest, dei ban kurup noh shisyndon bad leh ia ka jingtohkit ban lap ia ka jingshisha”.
“Ia ki nongtrei ha ki Aadhaar Enrolment Centre dei ban ai ia ka hukum ba pyrkhing ba ki dei ban husiar bha ha ka ba peit ia ki briew bad ki kot ki sla jong ki hashwa ban pynrung kyrteng Aadhaar bad ba lada ki lap ia kino kino kiba kim i shaniah dei ban sangeh noh na ka ba pynrung ia kiba kum kita bad pyntip wut sha ki Bor District ban leh ia kaba donkam” la ong biang u Bah Dkhar.
Ha kawei pat ka liang, u Reachingson Siangshai, Vice President jong ka seng, u la ong ba ka seng ka la ai jingmut ruh ia ki Bor District ba lada long kaba lah kan bha shibun eh ban bthah ia ki nongpynrung kyrteng Aadhaar ba ki dei ban leh da ka ba jied da ki shnong, kawei hadien kawei pat bad ruh bad ai bor ha ki Dorbar Shnong ban jied hi ia la ki volunteer ban peit ngor ha kaba kum kata ka sngi pynrung kyrteng ia la ki jong ki nongshongshnong jong ki.
U Bah Siangshai la bynrap shuh shuh “Hoid, ngi tip ba ia ka kam pynrung kyrteng Aadhaar la ai kontrak da ka sorkar pdeng, hynrei ngi kyntu ia ki Bor District ba kino kino kiba mut ban wan pynrung kyrteng Aadhaar ha Jaiñtia, ki dei ban da ioh bor shuwa na ki Bor District bad ruh na ki Bor Shnong bad ruh ba ki dei bad pynrung kyrteng tang lyngba ka jingiatreilang bad ki Bor District lem bad ki Dorbar Shnong khnang ba kin ym mih ki jingeh hadien habud ia ka pateng jong ngi”.
“Ngim tip la ki Bor District ki buh rekod bha ne em ia ki kyrteng jong kito kiba la pynrung kyrteng ha u Aadhhar. Ngim da tip shai bha ‘Kei kata ka Aadhaar bad kaei ka jingthmu jong ka’. Kumta, ngi dei ban long husiar lypa ia kane, khnang ba ka Aadhaar, kan ym ktah ia ka iap ka im jong ka Ri bad ka Jaidbynriew rit paid jong ngi hadien ha bud.”
“Ngi kyntu ruh ia ki Bor district ba kin long kiba peitngor bha ia ka rukom pynrung kyrteng Aadhaar bad ruh ba ki dei ban bthah ia ki nongpynrung kyrteng Aadhaar ba ki dei ban pynbiang ia ka baroh ki list bad ki kot ki sla (xerox copy) jong ktio ia kiba ki la pynrung kyrteng ha ka system (UIDAI), khnang ba yn ioh ban buh rekod na ka bynta ka jingdonkam jong ka District bad ruh ban ioh khylli biang ha kano kano ka por, lada donkam ban leh kumta. ” ong biang U Bah M H Dkhar.
Ha ka jingiadei bad ka jingpynrung kyrteng Aadhaar, don shi khung ki mat jingdawa ba ngi la buh ha khmat ki Bor District ka EJHD. Ngin dang ia buddien shait shait ia ka rukom pynrung kyrteng Aadhaar ha ka District, la pynkut u kyrwoh na ka AJYWO.
