Jowai, Nohprah, 17: Ka AJYWO Central Body, ka bym shym la shong kli kti halor ka jingiadie iathied Residential Certificate thok ha EJHD na ka bynta iong rung Aadhaar, ki briew ba nabar, ka seng ha ka sngi palei ba la dep, ka la ia kynduh ia u ADC jong ka EJHD, u Bah SS Syiemleh, MCS ha ryngkat ki mat jingdawa ba dei ban weng noh ia baroh kito ki ba la pynrung kyrteng Aadhaar lyngba ka sertiphiket thok bad ban pynshitom ia baroh kito ki ba la leh ia katei ka kam thok.
U Ba M H Dkhar President jong ka AJYWO Central Body, u la ong, “Ha ka jingiakynduh jong ngi ia u ADC ka EJHD, u bah SS Syiemlieh, ngi la buh ia shibun ki mat jingdawa halor ka rukom pynrung kyrteng Aadhaar . Ki katto katne na kita, ki long ba ba dei ban pynrung tang ia ki briew trai ri trai muluk jong ngi hi lada ki mon. Ia ki barjylla pat, ai kin mat leit pynrung kyrteng Aadhaar hi ia lade sha la ki jong ki shnong. Lada ki briew jong ngi ki ba sah shabar jylla ki hap wan leh Aadhaar haduh shane, balei ngi ruh ngim lah ban leh kum juh ia ki ba nabar khnang ba ka Aadhaar kan ym ktah ia Ri bad ka Jaidbynriew jong ngi hadien ha bud.”.
Shuh u Bah Dkhar u la ong ba nalor ka EPIC, dei ban pdiang tang ia ki Residential Certificate ba la ai da ki Waheh Shong na ka bynta katei ka kam bad ba baroh kitei ki kot dei ban attest da ki sahep sorkar bad ba ha ka por ba attest ruh dei ban pan bad ia ki orijinal lym kumta ym bit ban attest bad ruh ba lada lap ia kino kino ki kot ba i don jingsuba eiei, dei ban kurup noh shisyndon bad tohkit ban lap ia ka jingshisha”.
“Ia ki nongtrei ha ki Aadhaar Enrolment Centre dei ban ai da ka hukum ba pyrkhing bha ba ki dei ban husiar bha ha kaba peit ia ki briew bad ki kot ki sla jong ki hashwa ban pynrung kyrteng Aadhaar bad ba lada ki lap ia kino kino kiba kim i shaniah dei ban sangeh noh na ka ba pynrung ia kiba kum kita bad ban pyntip wut sha ki Bor District ban leh ia kaba donkam” la ong biang u Bah Dkhar.
Ha kawei pat ka liang, u J.R Siangshai, Vice President jong ka seng, u la ong ba ka seng ka la ai jingmut ruh ia ki Bor District ba lada long kaba lah kan bha shibun eh ban bthah ia ki nongpynrung kyrteng Aadhaar ba ki dei ban leh da ka ba jied da ki shnong, kawei hadien kawei pat bad ruh bad ai bor ha ki Dorbar Shnong ban jied hi ia la ki nongpeit-pyrman ban peit ngor ha ka sngi pynrung kyrteng ia la ki jong ki nongshongshnong jong ki.
U Bah Siangshai la bynrap shuh shuh “Hoid, ngi tip ba ia ka kam pynrung kyrteng Aadhaar la ai kontrak da ka sorkar pdeng, hynrei ngi kyntu ia ki Bor District ba kino kino kiba mut ban wan pynrung kyrteng Aadhaar ha Jaiñtia, ki dei ban da ioh bor shuwa na ki Bor District bad ruh ki Bor Shnong bad ruh ba ki dei bad pynrung kyrteng tang lyngba ka jingiatreilang bad ki Bor District bad ki Dorbar Shnong khnang ba kin ym mih ki jingeh hadien habud ia ka pateng jong ngi”.
“Ngim tip la ki Bor District ki buh rekod ne em ia ki kyrteng jong kito kiba la pynrung kyrteng ha u Aadhhar. Ngim da tip shai bha ‘Kaei kata ka Aadhaar bad kaei ka jingthmu jong ka’. Kumta, ngi dei husiar lypa ia kane, khnang ba ka Aadhaar, kan ym ktah ia ka iap ka im jong ka Ri bad ka Jaidbynriew rit paid jong ngi hadien ha bud.”
“Ngi kyntu ruh ia ki Bor District ba kin long kiba peitngor bha halor jingpynrung kyrteng Aadhaar bad ruh ba ki dei ban huh rekod lang ia ka baroh ki jnit ki jnat ba donkam jong kito kiba la dep pynrung kyrteng Aadhaar, khnang ba yn ioh ban khylli biang ha kano kano ka por ba donkam”, ong u Bah M H Dkhar.
Ha ka jingiadei bad ka jingpynrung Aadhaar, don shi khung ki mat jingdawa ba ngi la buh ha khmat ki Bor District ka EJHD. Ngin dang ia buddien shait shait ia ka rukom pynrung kyrteng Aadhaar ha ka District, la pynkut u kyrwoh na ka AJYWO.
