Iakynduh ka seng AJYWO ia u CEM, JHADC, Dawa ban khynra Trading License 

Jowai, Naiwieng 27: Ka All Jaiñtia Youth Welfare Organisation (AJYWO)- Central Body, ha ka jingbuddien halor ka Trading Licence bad ka Non-Tribal Employees Service Licence hapoh Jaintia Hills, mynnin ka sngi, ka la iakynduh markhmat ia u CEM, JHADC, Ma Madonbai Rymbai,  ha ryngkat ka jingaiti ia ka dorkhast ban dawa ban khynra Trading License bad Employment Service License.

Ha ka jingiakynduh ia u CEM ka JHADC, ka AJYWO, hapoh ka jingialam u bah MH Dkhar, President bad u Bah Reachingson Siangshai Vice President,  ka la dawa na u CEM ka JHADC ba u dei  ban pyntrei kam pura noh ia ka ‘The Jaintia Hills Autonomous District (Trading by Non-Tribal) Regulation (Act)-2011’ bad ban khynra ia ki nongwei Trading License bad ESL noh bad ban pynshitom pynshitom ka kum ka ain  ia kito kiba leh business beaiñ.

Kum  ban shu pynkynmaw, kat kum ka jingioh jingtip lyngba ka RTI, don tang 321 tylli ki Trading Licence kiba dang trei kam na ki 2785 tylli bad kane ka jingduna palat ki Trading License ha Jaintia Hills ka la pynshaiong ngaiñ ia ka AJYWO halor ka jingiohthiah lyngngai jong ka JHADC.

Ha ka dorkhast jong ka seng, la ong ba “Ka jingbym pyntreikam jong ka JHADC ia ka aiñ kaba teh lakam iaka khaii-khaba jong ki nogwei ha Jaintia Hills ka wanrah ym tang ia ka jingduhnong kaba khraw ia ka JHADC ha ka liang ka jingoh pisa hynrei kane kan ktah bad buh ruh ha ka jingma ia ka khaii-pateng, ka ioh ka kot bad ka jinglongshngaiñ ka jaidbynriew ba tang shi troh”.

“Ngim kwah ba ka Jaintia Hills kan dei bneng jong ka ki lad kamai jong ki nongwei tang na ka daw jong ka jingbym pyntrei kam pura jong ka JHADC ia ki aiñ kiba dei ban teh lakam ia ka kamai-kajih jong ki nongwei hange”, ong u Bah M H Dkhar, President jong ka AJYWO Central Body.

“Ngi dawa na ka JHADC kaba dei ka nongri nongsumar ia la ka jaidbynriew trai ri trai muluk rit paid ba ka dei ban pyndonkam la ka iktiar ka kum ba la pynkup bor ia ka ha ka ban teh lakam ia ka kamai kajih beaiñ jng ki nognwei ha Jaintia Hills,” ong u Bah R.Siangshai, VP ka AJYWO.CB.

Ka seng ka ai jingmut sha ka JHADC, ba lada ka duna nongtrei ban peit ngor ia ka khai-pateng beaiñ jong ki nongwei ha Jaintia Hills, khot da ka jingpynbna paidbah, thung nongtrei noh wut n aka bynta ban trei ia kane ka kam namr don da ki lang ngut ki samla Jaintia ki bym don kam don jam. Ka pisa ka la mih hi n aka Trading Licens & ESL ban siew tulop ia ki.

“Ka jinggong ba ka Bangladesh kan sha tap um; Ka jingshah pynher krat jong ki Ronghiya na Myanmar; Bad ka  jingshah kyntait ki 40 lakh tam ngut na ka Assam NRC, kane kan buh ha ka jingma kaba khraw ia ka jylla Meghalaya namar ka thong jong kiba kum kitei ki kynhun jaidbynriew ioh lehse ka dei ban bsuh khlieh ha Meghalaya, namar katkum ba ka long mynta, ha Jaintia Hills katba nangiaid ki sngi, nangjyllei ki poi-ei ki bym ithuh ithaw shuh bad ki dukan dukdoh nongwei ruh ki la nang man bun kat ba nangiaid ki sngi.

“Lada kumne ka rukom long rukom man ha ka jylla; Lad ka Sorkar Jylla bad ki District Council ki iohthiah lut bad kim  shym la patiaw ban peit ngor ia ka rung ka mih, ka shong ka sah bad ka trei ka ktah, ka khaii-pateng jong ki nongwei hangne, shaei ka lawei jong ka jaidbynriew rit paid jong ngi?”  la bynrap biang u Bah M H Dkhar.

Ka seng ka dawa  na ka JHADC ba kan trei la ka jong ka kamram ban tehlakam ia ka Trading License bad ka ESL. Ngin peit katto katne por, lada ka JHADC kam  sngap ia ki jingdawa jong ka seng,  ngim ban seh kum ki khun samla jong ka Ri Jaintia kiba don ia ka jingbakhlieh naka bynta ka jaidbynriew lade ban ngin mih hi noh sha khmat trei la ka jong ka kamram na ka bynta ka iap k aim jong ka jaidbynriew.

What Next?

Recent Articles

Leave a Reply

Submit Comment

*