Shillong, Naitung 05: Myna 
ka sngi u MLA jong ka Mawsynram u Bah Himalaya M Shangpliang u la ialam ka kynhun sha u myntri rangbah ka jylla u Conrad K Sangma ban ai ia ka dorkhas ban dawa ba ka sorkar ka dei ban pynioh lem ia ka Mawsynram Civil Sub Division.
Ha kane ka dorkhas kaba la ai sha u myntri rangbah la kylla, la thoh bad batai bniah ia ka jingeh kaba ka thain Mawsynram ka ia kynduh, la thoh ruh ia ki nongrim kiba la pynshongnia halor kane ka jingdawa ia ka Civil Sub Division hapoh Mawsynram Konstitwensi.
Ha kane ka jingiakynduh na ka liang jong u myntri rangbah u la pdiang sngewbha ia kane ka kynhun hapoh ka ophis trei kam ka jong u bad kala don ka jingiakren ha kaba u myntri rangbah jong ka jylla u Conrad ka Sangma u la shahskhor ia kaei kaba kane ka kynhun hapoh ka jingialam jong u MLA kala don ban pynsngew.
Kane ka long ka sien kaba nyngkong na ka liang jong ka thain Mawsynram ban leit ia kynduh ia u myntri rangbah jong ka jylla hapoh ka jingialam jong u MLA ban dawa ia ka Civil Sub Division na u myntri rangbah. Ka jingdawa ia ka Mawsynram Civil Sub Division kala long 20 snem mynshuwa hynrei ka shu long tang na ki seng bhalang.
Kane ka jingdawa ia ka Mawsynram Civil Sub Division hapoh ka jingialam jong u MLA ka Mawsynram u Bah Himalaya M Shangpliang ka long ka jingdawa jong ki paidbah ha kaba baroh ki paidbah jong ka Mawsynram Konstitwensi kila ai ka jingkyrshan ia kane ka jingdawa Civil Sub Division.
