Shillong, Jymmang 25: Ka kynhu
n jong ki paidbah na ka Ranikor Konstitwensi mynta ka sngi hapoh ka jingialam jong u MLA jong ki u Martin M Danggo kila leit ban ia kynduh ia u myntri rangbah ka jylla u Conrad K Sangma ban ai ia ka dorkhas ban dawa ba dei ban kyntiew noh ia ka Ranikor Adminstrative Unit sha ka kyrdan Civil Sub-Division, kaba hap hapoh jong ka South West KHasi Hills District.
Haba kren ha ki lad pathai khubor ha dien ka jingiakynduh ia u myntri rangbah kajylla ha kaba la ia don lang ruh u symbut myntri rangbah ka jylla u Bah Prestone Tynsong, ha kane ka jingiakren na ka liang jong u myntri rangbah ka jylla u la ong ba kajingdawa jong ki paidbah ka thain Ranikor ka long kaba dei hok.
Ha kane ka jingiakynduh na ka liang jong u myntri rangbah u la ai ka jingkular ia kane ka kynhun ba ka sorkar kan sa bishar bniah ia kane ka jingdawa ban kyntiew ia ka Ranikor Adminstrative Unit sha ka Civil Sub-Division. La iathuh ba ia kane ka juh ka dorkhas la ai sha ka Task Force Committee ha u snem 2007. Ha une u juh u bnai ia kane ka dorkhas la aid a u MLA jong ka Mawkyrwat u Bah Renikton Tongkhar ha ka jingiadon lang u symbut myntri rangbah ba rim ka jylla u Bah Rowell Lyngdoh ha Mawkyrwat.
Ha kane ka jingiakynduh bad u myntri rangbah ka jylla u MLA jong ka Ranikor u la kyntu ia ka sorkar ba ka dei ban plienoh ar tylli ki C&RD Block kawei ka Khonjoy bad kawei ka Wahkaji. Ha kane ka sngi la dawa ruh na u myntri rangbah ban ai ia ka Community College hapoh jong ka Ranikor. Kane ka thain ka don kam ia ka College namar ha baroh kawei ka thain ym don college ki samla pule ki hap ban leit sha bar jong ka thain ban leit pule.
Ha kane sngi la ia kren ruh ban ka sorkar ka dei ban kyntiew kyrdan noh ia ki lai tylli ki PHC ka Rangthong, Khonjoy bad Wahkaji sha ka kyrdan CHC. Halor kine ki jingdawa kiba kane ka kynhun kala buh ha khmat jong u myntri rangbah ka jylla na ka liang jong u myntri rangbah u la shah skhor ia ka jingkren ka jong ki namar ki jingdawa ki long kiba ia dei bad ka jingdon kam jong ki paidbah katei ka thain namar ka Ranikor ka dei ka jaka kaba dang sah dien tam.
