Shillong, Naiwieng 30: Ki paidbah na ka Ri India bad na kiwei pat ki Ri jong ka pyrthei ki la iap biej ia ki symbai trai ri kiba la leit ban pyni nam da ki nongrep kiba dei ki dkhot jong ka Hill Farmers Union (HFU) ha ka Organic Festival kaba la tip kum ka 7th National biennial convention on Organic Farming kaba la long ha Udaipur.
Ki nongrep jong ka HFU hapoh ka jingialam jong u bah Allfondbirh Kharsyntiew General Secretary jong ka seng ki la rah ia shibun ki symbai tri ri kiba khlem ai dawai. Napdeng ki symbai ki la leit rah da ka seng ki kythup ia ki symbai tyrso, pathaw, sohngang, sohmynken, sohkhia bad bun jait ki jhur bad ki soh.
Na ka liang jong ki nongwan jngoh ia ka jaka pyni nam ia kine ki symbai ba la leit rah da ka HFU ki la pynpaw ia ka jingiap biej bad ki la kwah ban ioh symbai.
U bah Commander Shangpliang president jong ka HFU u la iathuh ba na ka liang jong ka seng kan sa rep bad pynroi ia kine ki symbai kiba khlem ai dawai ha kaba yn sa sam sha ki nongrep bad sha ki jylla bapher bapher. Hynrei ban pynurlong ia kane ka donkam ia ka jingiatreilang jong ki nongrep bad ka jingkyrsha jong ka sorkar.
U bah Shangpliang u la kyntu ia ki nongrep kiba don jaka bad kumjuh ruh ia ki briew kiba kwah ban iarap ia ki nongrep ba kin iarap ban ai jaka kyrpang ia ka seng ban pynroi ia kine ki symbai na la ka jong ka jylla.
U la kyntu ia ki nongrep bad ki riew rangbah kiba kloi ban iarap ka seng ban phone ha u nymber 9863512121. U la ong ba ka sorkar barabor ka ju wanrah ia ki symbai kiba nabar ban sam sha ki nongrep, hyrnei nangne shakhmat dei ban iarap bad kyntiew ia ki symbai lajong. U la kitbok ia ki dkhot jong ka seng ba kin ioh ia ka met kaba koit ba khiah ha ka organic festival kaba 3 sngi ha Udaipur.
