Shillong, Jymmang 05: ka long kaei kaei kaba pynkyndit ha kaba ki ngap kiba la ri da ki briew ha shnong Umthied Lawkasoin bad ha shnong Mawkhan kila shu iap them khlem da tip na kaei ka daw, ym dei ba ba ki iap hynrei ka don ka jingsma iewtung na ka jingiap jong kin gap.
U Bah Jodi Syiemlieh na ka shnong Umthied Lawkasoin haba kren ha u SP News Agency u la iathuh ba mynta u bnai la shem ba ki ngap kiba la ri ha ki ksing kila iap baroh hynniew ksing bad kane ka jingiap kam dei tang ki jong u hynrei baroh kiba ri ngap hapoh ka shnong ruh ki iap lang kumba long ki ngap jong u.
U Bah Syiemlieh u la iathuh ba kane ka jingiap jong ki ngap kam dei tang ha katei ka shnong hynrei wat hapoh ka shnong Mawkhan kaba markhap bad ki. La iathuh ba kane ka jingiap ki ngap ka kham long phylla namar ka mih ka jingsma iewtung na kine ki ngap kiba iap.
Na ka liang jong u Bah Syiemlieh u la iathuh ba ha ki snem kiba la dep da iap ruh ka long eh tang shi ksing kata ruh lada ka phet noh ka kiaw ngap ne ka iap noh ka kiaw ngap, hynrei kam ktah ia kiwei pat ki ksing ngap. La iathuh ba u la wan training ruh ha kane ka kam ri ngap. La iathuh ba la ioh ruh ia ki ksing ngap ba la ai da ka sorkar bad ki ksing ngap kiba u la shna hi.
U Bah Syiemlieh u la ong ba kine ki jaka ki hap hapoh jong ka Mawthadraishan Block jong ka West Khasi Hills District. Kaei kaba u kwah ban sngewthuh ka long hato kane ka jingiap them jong ki ngap kan ktah ne em ia ki briew lada ki bor sorkar ki lah ban peit lem ban lap ia ka daw jong ka jingiap kin gap.
