Shillong, Nailur 23: U myntri rangbah ka jylla u Dr Mukul Sangma mynta ka sngi u la leit ban ia shim bynta ha ka jingiakynduhlang jong baroh ha ka “Get-Together of Harmony” jong ka Central Puja Committee (CPC) ha Sri Aurobindo Institute jong ka Indian Culture Auditorium, Shillong ia kaba la pynlong da ka Nepali Puja Committee, Lower Jail Road, Shillong. Kane ka long ruh ka sngi plie ia ka jubilee Rupa jong ka CPC.
Ha kane ka sngi u myntri khynnah jong ka sorkar pdeng u P P Chaudhary, ba dei peit ia ka tnad Corporate Affairs bad ki ka main, u MP jong ka Lok Sabha na Shillong, u Bah Vincent H Pala ruh kila ia don lang kum ki shah khot kyrpang. Haba kren ha kane ka sngi u myntri rangbah ka jylla u Dr Mukul u la ai ka jingiaroh ia ka CPC kaba la khot ia kane ka jingiakynduh lang ha kaba baroh ki jaidniam kila ia poi lang.
Kum kane ka jingiakynduh ka long kaei kaei kaba bha tam bad kaba kham niar ban lap bad u la kyntu ba lada lah ban leh ia kane ka juh ka jingiakynduh lang ha kiwei ki bynta jong ka Ri India ruh kum juh. La ong ba ka jylla Meghalaya la ioh khlem da don ka jingia umsnam.
La ong wat la ia ka jylla la ioh khlem da ia umsnam hynrei kane ka jingsul mynta kala sdang ban jah. U myntri rangbah u khot u wer ia baroh ban ia trei lang ban pynneh pynsah ia ka jingsuk kaba la kylla ka don. U la ong ruh ba ka jingleh kmen jong ki jaid niam baroh ha kane ka jylla dei ban kynmaw ba dei ban pynneh pynsah ia ka jingshong suk. Ha kane ka sngi u myntri rangbah u la pynlait paidbah ruh ia ka Diamond Jubilee Puja Souvenir jong ki Nepali Puja Committee.
Ha ka jingkren jong u Dr Subrata Das, Founder President, CPC, Meghalaya, u la ong ba ia ka CPC la seng ha u snem 1992 na ka bynta ka jingiaid beit iaid ryntih jong ka jinglehniam Durga Puja bad kiwei kiwei ki jinglehniam jong ki riew ngeit Hindu. Yn tang kata ka CPC kala leh bun ki kam treimon sngebwha ruh ia baroh ki jaidbriew.
Ha kaba sdang baroh ki nongialam na ki niam bapher bapher kila kren sha phang ka jingsuk, ki wei kiba la ia don lang ki long ka kong Dr M Ampareen Lyngdoh ka myntri jong ka sorkar jylla u bah Paul Lyngdoh, Bah A L Hek, Bah Shanbor Shullai kiba dei ki MLA u Bah Adelbert Nongrum MDC ruh u la ia don lang ha kane ka sngi.
