Iaroh u Lat ka jylla Meghalaya u Tathagata Roy ia ka jingitynnad jong ka mariang

Shillong, Nailar 11: U Lat ka Jylla Meghalaya, Tathagata Roy mynta ka sngi u la iaroh ia ka jingitynnad jong ka mariang ha Meghalaya da kaba bynrap ba kane ka jingitynnad ka plie ia ki lad kiba bun ia ka jylla ba kan ianujor bad kiwei kiwei ki jaka jngoh kai pyrthei kiba khring bha ia ki briew ha ka ri bad wat shabar ri ruh, dei namar kata la ju khot ia ka, ka Scotland of the East ha ka ktien phareng.

U la ai jingkren ha ka Webinar halor ka Ek Bharat Shreshtha Bharat (EBSB) ba la pynlong da ka Press Information Bureau, Lucknow ha ka jingiatreilang bad ka PIB Meghalaya bad Arunachal Pradesh.

Ka jingthmu ba kongsan jong kane ka webinar kalong ban wanrah ka jing kyntiew jingtip hapdeng ki Jylla da kaba iasam ia ki rukom treikam kiba biang tam bad ki jingshem hapdeng ki jylla.

Hapoh ka EBSB la pynbeit jur (paired) ia ka Uttar Pradesh bad ka Meghalaya bad ka Arunachal Pradesh. Haba kren shaphang ka jingkongsan ka virtual seminar, u Lat u la ong ba kum kine ki jait workshop kilong kiba donkam bha namar ki bun ki briew kiba dang duna jingtip shaphang ka thain shatei lammihngi.

U Lat u la ong ba um sngewtynnad ban iohsngew ia ka ktien ‘mainstream’ kumba ju iohsngew haba iakren shaphang kiwei kiwei ki bynta jong ka ri. Ha kane, u la ong ba ka Meghalaya bad ka Arunachal ruh ki dei ki bynta jong ka India kumba long ka Delhi bad Uttar Pradesh.

Ha ka jingkren jong u ha kane ka seminar ba la pynlong online, u Roy u la ong ba dang lah ban leh shibun ki kam ban ioh jingmyntoi na ka jingitynnad jong ka jylla. da kaba kyntiew ia ki jingdon jingem ha ki bynta bapher bapher jong ka Meghalaya. U Lat u la kren ruh shaphang ki por khynnah jong u ha Shillong.

U Lat u la kren shaphang ki briew jong ka jylla bad ki ktien ba ki kren. U la iaroh ia ka jylla kaba dang don 77% ka jingtap ki khlaw wat haba kane ka la hiar bha ha kiwei kiwei ki thain. Ha kaba kren shaphang kane, u la kdew ia ka UP kaba don tan 16% ka jingtap ki khlaw mynta.

U la ong, “Namar ka jingdon ka khlam COVID-19 ha kylleng ka pyrthei, ka la pyrkhing ia ka leit ka wan jong ki briew, hynrei wat nym pynlehnohei ia ka lad ban wan jngoh kai ia ka Meghalaya, namar kalong ka jaka kaba itynnad.

Ki briew hangne kilong kiba sngewtynnad bad ka suin bneng ruh kalong kaba sngewtynnad.” U la kren ruh shaphang ka jingkhuid ka um ha wah Dawki, ka um kaba sngur ha kaba lah ban iohi lyngba 15 haduh 20 phut shapoh. Ka Sohra kaba ju tip kum ka Cherrapunjee, kalong ka jaka kaba jur slap tam ha sla pyrthei, kaba dap da ki kshaid kiba itynnad bad ki krem kiba jylliew, baroh ki long kiba phylla bad itynnad bha, u la bynrap.

Ka India ka dei ka ri ha kaba man ka thain ka don la ka jinglong bad ka Meghalaya ka dei ka jaka kaba don shibun ki jinglong kyrpang, u la ong da kaba bynrap ba ia ka jingiatylli hapdeng ki jingiapher lah ban iohi haba ngi peit ia ka Nartiang ha Jaintia Hills ha kaba u nongialam jong ka temple u dei uba na Maharashtra.

U la pynkut da kaba ong ba ia ka Ek Bharat Shreshtha Bharat la saindur da u Myntri Rangbah Duh ka Ri, u Narendra Modi da kaba peit ia kane ka jingiatylli ha kaba kawei ka jylla ka ioh lad ban ioh jingtip shaphang kawei pat ka jylla.

U Pankaj Singh, MLA ka Uttar Pradesh, u la kren ruh halor ka jingdonkam ba ki briew ka India kin sngewthuh kylliang ia ki kolshor bapher bapher jong ki, u la khot sngewbha ruh ia ki briew jong ka Meghalaya ban wan jngoh kai ia ka Uttar Pradesh bad ban sakhi ia ka industrial corridor jong ka.

Ka jingkyntiew ia ka jingpynmih kyrpang ki mar ha ki distrik ba kyrpang, ka jingsaindur ban pyntbit ha ka sap treikam na ka bynta kito kiba wanphai namar ka khlam Covid-19. U la kyntu ruh ia ki briew jong ka Uttar Pradesh ban leit jngoh ia ka Thain shatei lammihngi namar baroh ngi iadonlang ha kawei ka ri.

U Manoj Dixit, VC barim, ka Dr. RML Avadh University, Ayodhya u la ong ba ka thong jong ka Kam jngoh kai pyrthei kalong ban wanrah ka jingsngewthuh, ka jingiadon bynta ki briw na kawei ka jylla sha kawei pat.

Ka jingdon jingtip shaphang kawei ka jylla ia kawei pat kan pyniasoh ia ka India sha ka jinglong kawei, u la bynrap. U la kren ruh halor ka bynta ba ka Meghalaya ka lah ban nohsynniang sha ka Uttar Pradesh bad ka Uttar Pradesh sha ka Meghalaya.

Ia ka webinar la pyniaid da u ADG Region Lucknow, RP Saroj bad la iashim bynta da ki nonghikai bad ki nongthoh khubor jong ki lai tylli ki jylla.

 

 

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet